Рэспубліканская навукова-практычная экалагічная канферэнцыя «Праблемы ацэнкі, маніторынгу і захавання біяразнастайнасці»

23 лістапада 2017 года на біялагічным факультэце нашага ўніверсітэта адбылася Рэспубліканская навукова-практычная экалагічная канферэнцыя «Праблемы ацэнкі, маніторынгу і захавання біяразнастайнасці», арганізаваная кафедрай батанікі і экалогіі. У працы канферэнцыі прынялі ўдзел больш за 50 навукоўцаў, якія прадстаўляюць БрДУ імя А.С. Пушкіна; Нацыянальны каардынацыйны цэнтр па генетычных рэсурсах, ДНУ «Інстытут генетыкі і цыталогіі НАН Беларусі»; ДНУ «Цэнтральны батанічны сад НАН Беларусі»; ДНУ «Палескі аграрна-экалагічны інстытут НАН Беларусі»; Віцебскі дзяржаўны ўніверсітэт імя П.М. Машэрава; Беларускую дзяржаўную сельскагаспадарчую акадэмію, Горкі; ФДБАУ ВА «Тульскі дзяржаўны ўніверсітэт»; ФДБУ «Дзяржаўны прыродны запаведнік «Калагрыўскі лес» імя М.Г. Сініцына»; ФДБУ навукі «Нікіцкі батанічны сад», Крым; Паўночны (Арктычны) федэральны ўніверсітэт імя М.В. Ламаносава, Архангельск.

У сваім прывітальным слове дэкан біялагічнага факультэта Таццяна Віктараўна Нічышына азнаёміла ўдзельнікаў канферэнцыі з напрамкамі навукова-даследчай дзейнасці на біялагічным факультэце БрДУ імя А.С. Пушкіна. Выкладчыкі БрДУ выступілі з пленарнымі дакладамі, прысвечанымі пытанням анатоміі і сістэматыкі раслін, рэжымам кропельнага арашэння ягадных культур, вырошчванню кавуна сталовага ва ўмовах Рэспублікі Беларусь, уплыву брасінастэроідаў на развіццё сельскагаспадарчых культур, уплыву лесанарыхтоўчай тэхнікі на кампаненты лясных насаджэнняў і інш. Перад пачаткам працы секцый кіраўнік Цэнтра экалогіі Аляксандр Пятровіч Колбас правёў азнаямляльную экскурсію па экспазіцыях Зімовага саду.

На пасяджэннях секцый канферэнцыі навукоўцы Беларусі і Расіі абмеркавалі актуальныя пытанні экалогіі, маніторынгу прыродных і антрапагенных экасістэм, рацыянальнага прыродакарыстання і аховы навакольнага асяроддзя, сучаснага стану флоры і фаўны, аграэкалогіі, біяіндыкацыі і біятэставання, а таксама экалагічнай адукацыі.

У дыскусіях на канферэнцыі адзначалася разнастайнасць тэарэтычных і прыкладных праблем сучаснай біялагічнай навукі, абмяркоўваліся і прапаноўваліся розныя спосабы іх вырашэння. Па выніках працы канферэнцыі быў выдадзены зборнік матэрыялаў.

Біялагічны факультэт