Да 500-годдзя беларускага кнігадрукавання

2017 год, які з’яўляецца Годам навукі ў Беларусі, адметны юбілеем сусветнай значнасці, што ўнесены ў каляндар памятных дат ЮНЕСКА – 500-годзем беларускага кнігадрукавання. У 1517 г. асветнік і гуманіст Францыск Скарына надрукаваў у Празе першую беларускую і ўсходнеславянскую кнігу «Псалтыр». 14–15 верасня 2017 г. у Мінску ў Нацыянальнай бібліятэцы Беларусі адбыўся міжнародны кангрэс «500 гадоў беларускага кнігадрукавання», які прайшоў пад патранатам ЮНЕСКА. Яго арганізатарамі выступілі Міністэрства культуры і Нацыянальная бібліятэка Беларусі, суарганізатарамі – Цэнтральнаеўрапейская ініцыятыва, Бібліятэчная асамблея Еўразіі пры падтрымцы Міждзяржаўнага фонду гуманітарнага супрацоўніцтва дзяржаў – удзельніц СНД і шэрагу іншых партнёраў. Удзел у кангрэсе прынялі больш за 600 аўтарытэтных спецыялістаў устаноў культуры, навукі і адукацыі з 24 краін свету.

Асноўнай тэмай у час пленарнага і секцыйных пасяджэнняў, «круглых сталоў» была асоба Ф. Скарыны, яго дзейнасць і спадчына. Сярод удзельнікаў кангрэса быў загадчык кафедры гісторыі славянскіх народаў БрДУ імя А.С. Пушкіна, доктар гістарычных навук, прафесар Аляксандр Мікалаевіч Вабішчэвіч, які прадставіў даклад аб ушанаванні памяці Ф. Скарыны ў Заходняй Беларусі ў 1921–1939 гг. На адкрытай падчас кангрэса міжнароднай выстаўцы «Францыск Скарына і яго эпоха» экспанаваліся арыгіналы і факсіміле першых друкаваных кніг ХV–XVII стст., у тым ліку Біблія Іагана Гутэнберга (1450-я гг.), а таксама арыгінальныя пражскія і віленскія выданні Ф.Скарыны 1517–1525 гг. з фондаў Нацыянальнай бібліятэкі Беларусі.

Кафедра гісторыі славянскіх народаў