Камедыя-карнавал у дзвюх дзеях з музыкай, танцамі і сардэчным прыступам

19 снежня тэатральны гурток філалагічнага факультэта пад кіраўніцтвам дацэнта С.М.Шчэрбы прадставіў на суд гледача новую пастаноўку з інтрыгуючай назвай “Аперацыя “Мнагаженец”, або Гульні дарослых”.

На сцэне актавай залы ўніверсітэта маладыя акторы разыгралі камедыю-карнавал у дзвюх дзеях з музыкай, танцамі і сардэчным прыступам – менавіта так вызначыў жанр сваёй п’есы беларускі драматург Анатоль Дзялендзік. Ужо вядомыя па “Паўлінцы” акторы Сяргей Смаршчок і Вікторыя Мацука з’явіліся ў нечаканых вобразах: Сяргей іграў галоўную станоўчую ролю, а Вікторыя – адмоўную.

На таленавітага вучонага, сціплага і шчырага чалавека Льва Бабачкіна (С.Смаршчок) ўзведзены паклёп: ён абвінавачаны ў шматлікіх любоўных інтрыгах. Такім чынам дырэктар НДІ А.П.Туманава (В.Мацука) хоча адпомсціць за крытычную рэцэнзію і заняць больш высокую пасаду, дыскрэдытыраваўшы канкурэнта.

У зусім новых вобразах убачылі гледачы і іншых актораў “Паўлінкі”: Юлію Юраўскіх, Наталлю Гаркаўчук, Валянціна Кушнера і Дзмітрыя Машлякевіча. Сапраўдным адкрыццём сталі дзве новыя зоркі з другога курса – Марыя Чахоніна і Алеся Сіманоўская. Вельмі добра справіліся са сваімі ралямі і першакурснікі – Міхаіл Каралевіч і Аліна Паўлюкавец. Трэба адзначыць і працу гукарэжысёра – таксама першакурсніцы Вольгі Кухарэнка, яна вельмі ўдала падабрала музыку да спектакля.

Удзячныя гледачы чакаюць новых спектакляў!

Філалагічны факультэт