Мы да пушкінскіх радкоў: «Сябры, цудоўны наш саюз...»

11 мая ў актавай зале корпуса №2 прайшло ўрачыстае адкрыццё V юбілейнага Пушкінскага фестывалю. Арганізатарамі фестывалю выступілі кафедра тэорыі і гісторыі рускай літаратуры БрДУ імя А.С. Пушкіна, Упраўленне адукацыі Брэсцкага выканаўчага камітэта, Рускі цэнтр БрДУ імя А.С. Пушкіна.

Адкрывалі свята ганаровыя госці, суарганізатары фестывалю: Генеральны консул генеральнага консульства РФ у г. Брэсце М.М. Маткоўскі. Мікіта Мікалаевіч заўсёднік усіх мерапрыемстваў факультэта, добры сябар Пушкінскага фестывалю з першых яго дзён. Консул адзначыў, што фестываль значна вырас, выйшаў за рамкі нашага ўніверсітэта і нашай краіны, што не можа не радаваць.

Адным з ідэйных натхняльнікаў і арганізатараў першага Пушкінскага фестывалю ў далёкім 2000 годзе стала І.В. Чоўжык, намеснік начальніка Упраўлення адукацыі Брэсцкага выканаўчага камітэта. Ірына Васільеўна пажадала фестывалю сустрэць яшчэ не адзін юбілей.

З прывітальным словам да прысутных звярнулася дэкан філалагічнага факультэта В.А. Фелькіна і загадчык кафедры тэорыі і гісторыі рускай літаратуры Т.В. Сянькевіч.

Фестываль гасцінна сустрэў сваіх пастаянных удзельнікаў: навучэнцаў адукацыйнага цэнтра №19-89 Паўднёва-Заходняй акругі г. Масквы, якія ў гэтым годзе падарылі фестывалю асобную канцэртную праграму.

Музычны калектыў «Тарарам» (кіраўнік Герасевіч Л.К.), фіналістка конкурсу «Песня для Еўрабачання» Ангеліна Піппер і фіналістка конкурсу «Спеўныя гарады» Ірына Мазурко радавалі гасцей і ўдзельнікаў фестывалю музычнымі нумарамі.

Пачатак пакладзены. Праграма фестывалю ўключае конкурс чытальнікаў сярод студэнтаў і школьнікаў, сцэнічны конкурс, конкурс эсэ, адкрыты конкурс плакатаў і майстар-класы.

Фестываль аб’ядноўвае ўсіх тых, хто неабыякавы да жывога слова.

Кафедра тэорыі і гісторыі рускай літаратуры