Творчая сустрэча «У пачатку было Слова»

9 кастрычніка 2015 г. у чытальнай зале бібліятэкі ўніверсітэта адбылася творчая сустрэча «У пачатку было Слова» з калекцыянерам-бібліяфілам Андрэем Пятровічам Паўлючыкам (г. Брэст), у якой удзельнічалі выкладчыкі гістарычнага факультэта, студэнты спецыяльнасцей «Гісторыя (рэлігій)», «Гісторыя. Рэлігіязнаўства», «Гісторыя. Сусветная і айчынная культура».

У час сустрэчы А.П. Паўлючык не толькі апавядаў пра свой унікальны занятак – збіранне кніг Бібліі на розных мовах народаў свету, але і паказаў цэлы шэраг гэтых каштоўных выданняў, што захоўваюцца ў яго прыватнай калекцыі. Прысутным быў прадэманстраваны адпаведны ўрывак перадачы «Сіла веры» тэлеканала «Беларусь-3». Асноўную частку свайго выступлення з аўдыторыяй калекцыянер прысвяціў параўнальнаму аналізу праваслаўных, каталіцкіх, пратэстанцкіх беларускіх перакладаў Бібліі ХХ – пачатку ХХІ стагоддзяў, характарыстыцы іх тэкстаў, адметнасцям розных царкоўных выданняў.

У час сустрэчы зацікаўленыя прысутныя змаглі атрымаць дастаткова кваліфікаваныя  адказы па розных пытаннях біблеістыкі. Вядучы мерапрыемства – загадчык кафедры славянскіх народаў, доктар гістарычных навук Аляксандр Мікалаевіч Вабішчэвіч – адзначыў культуралагічную значнасць паказаных фаліянтаў, пажадаў госцю поспехаў у пачэснай справе збірання і вывучэння кніжнай спадчыны.

Кафедра гісторыі славянскіх народаў