Прэзентацыя ўнікальнага альманаха “Астрамечаўскі рукапіс”

Вывучэнне багатай культуралагічнай спадчыны Берасцейшчыны – адна з асноўных задач фальклорна-краязнаўчай лабараторыі, што працуе пры кафедры беларускага літаратуразнаўства. У бягучым годзе яна наладзіла цеснае супрацоўніцтва з Брэсцкім раённым выканаўчым камітэтам, які дапамагае ў правядзенні фальклорнай практыкі, садзейнічае выданню сумеснага краязнаўчага альманаха пад назвай “Астрамечаўскі рукапіс”, прэзентацыя якога адбылася 29 лістапада 2013 года ў Доме культуры вёскі Астрамечава.

У ёй прынялі актыўны ўдзел і прадстаўнікі нашага ўніверсітэта. Загадчык кафедры дацэнт У.А.Сенькавец пазнаёміў удзельнікаў прэзентацыі з гісторыяй і асаблівасцямі культурнага помніка – зборніка свецкай і духоўнай музыкі, песень і танцаў ХVII ст., што быў пакладзены ў аснову назвы альманаха.

Прафесар І.А.Швед – навуковы кансультант альманаха – расказала пра мэты і задачы яго выдання, раскрыла значнасць збірання і прапаганды багатага і адносна добра захаванага аўтэнтычнага фальклору Берасцейшчыны.

Студэнты філалагічнага факультэта А.Аксёнава, В.Бабкова, В.Гронская, Т.Дземiдзюк, В.Струг, Д.Алексіевіч рэканструявалі тэксты запісанага імі ў вёсках Брэсцкага раёна аўтэнтычнага фальклору. У іх выкананні прагучалі песні, а таксама празаічныя творы.

Вучэбная фальклорна-краязнаўчая лабараторыя