Свята беларускіх рамёстваў і спецыяльнасцяў: ад пакалення да пакалення

27 сакавіка 2014 года вучэбная фальклорна-краязнаўчая лабараторыя і цэнтр «Прафарыенцір» арганізавалі свята беларускіх рамёстваў і спецыяльнасцяў, на якім прысутнічалі студэнты сацыяльна-педагагічнага, філалагічнага факультэтаў і іншаземныя слухачы факультэта давузаўскай падрыхтоўкі.

Аўдыторыю ўпрыгожылі абрусы, ручнікі, дыванкі, посцілкі, прылады сялянскай працы і народнага быту. Ганаровымі гасцямі свята былі прарэктар па выхаваўчай і сацыяльнай рабоце Матыцына Інга Генадзьеўна, памочнік рэктара Іванчын Генадзь Іванавіч, дэкан факультэта давузаўскай падрыхтоўкі Мірская Алена Іванаўна, выпускніца псіхолага-педагагічнага факультэта, член Саюза пісьменнікаў Беларусі, паэтэса Марыя Якімук.

Кіраўнік цэнтра “Прафарыенцір” Кавалевіч Марыя Сцяпанаўна прапанавала прысутным звярнуцца да да багатай і невычэрпнай спадчыны беларускага народа, у якой увасобілася неабдымная, вечна жывая душа народа, яго багаты, назапашаны стагоддзямі практычны вопыт і эстэтычны густ. Створаныя па законах хараства вырабы народных майстроў не пакідаюць абыякавымі ні дзяцей, ні дарослых. Знаёмства з імі выклікае пачуццё гонару за свой народ, які ў цяжкіх умовах стварыў выдатныя, высокамастацкія вырабы з самых звычайных, шырокадаступных матэрыялаў: дрэва, гліны, лазы, саломы, льну і інш.

Падчас мерапрыемства прысутныя даведаліся пра гісторыю станаўлення народных промыслаў і рамёстваў на Беларусі. Прафесар Швед Іна Анатольеўна пазнаёміла слухачоў з традыцыйнай сімволікай вырабаў народных промыслаў. Паэтэса Марыя Якімук прачытала ўласны верш “Мама пякла пірог”і расказала пра прылады працы беларускіх рамеснікаў.

Асаблівую цікавасць у прысутных выклікалі майстар-класы: валяльнай справы “шапавалаў”, які арганізавалі і правялі супрацоўнікі і навучэнцы Брэсцкага абласнога эколага-біялагічнага цэнтра пад кіраўніцтвам педагогаў Хоміч Любові Адамаўны і Самаукінай Веранікі Аляксандраўны; па карвінгу, падрыхтаваны і праведзены начальнікам тарговага цэнтра ўніверсітэта Федасенка Ірынай Валянцінаўнай і загадчыкам вытворчасці Буян Таццянай Паўлаўнай.

Старшыя выкладчыкі кафедры тэорыі і методыкі эстэтычнай адукацыі Марчук Валерый Іванавіч і Марчук Марына Уладзіміраўна пазнаёмілі прысутных з асаблівасцямі прафесій майстроў ганчарнай справы, саломапляцення, выцінанкі, а таксама са старажытнай традыцыяй роспісу на жывым яйку пры дапамозе фарбаў і воску – пісанкі.

На працягу ўсяго свята гучалі беларускія народныя песні “Мой родны кут”, “Белавежская пушча”,“Спяваем разам”, “Ой, ляцелі гусанькі”, “Ой, рэчанька”, “Мой вяночак” у выкананні студэнтаў сацыяльна-педагагічнага і філалагічнага факультэтаў. У заключэнне іншаземныя слухачы факультэта давузаўскай падрыхтоўкі выканалі народныя туркменскія песні і танцы. Пераапрануўшыся ў беларускае традыцыйные адзенне, туркмены з задавальненнем танцавалі “Беларускую польку”.

Вучэбная фальклорна-краязнаўчая лабараторыя,
цэнтр «Прафарыенцір»