Кіналекторый “Вялікая вайна”

13 мая 2015 г. на гістарычным факультэце адбыўся кіналекторый “Вялікая вайна”, прысвечаны 100-годдзю падзей Першай сусветнай вайны на тэрыторыі Беларусі. Арганізатарам гэтага мемарыяльна-патрыятычнага мерапрыемства выступіла кафедра гісторыі славянскіх народаў. Студэнты мелі магчымасць паглядзець адну з 4-х серый (пад назвай “Вялікі зыход”) хранікальна-дакументальнага фільма “Вялікая вайна” (аўтар сцэнарыя – К. Луцкіна, 2014 г.). 

Гэты фільм вытворчасці Белтэлерадыёкампаніі (тэлеканала “Беларусь-1”) падрыхтаваны з удзелам айчынных вучоных-гісторыкаў, сярод якіх быў доктар гістарычных навук, загадчык кафедры гісторыі славянскіх народаў БрДУ імя А.С. Пушкіна А.М. Вабішчэвіч. Перад праглядам фільма ў выступленні-прэзентацыі ім былі закрануты драматычныя старонкі 100-гадовай даўніны, прадэманстраваны вынікі ўласных даследаванняў аб вайсковых пахаваннях ў заходнебеларускім рэгіёне і іх сучасным стане. Студэнты мелі магчымасць пазнаёміцца з адпаведнай картай вайсковых пахаванняў у межах Рэспублікі Беларусь і атрымаць неабходныя тлумачэнні, удакладненні. Кандыдат гістарычных навук, дацэнт А.А. Савіч прасачыў лёс настаўнікаў у ваенны час, паказаў уплыў Першай сусветнай вайны на этнадэмаграфічныя працэсы на беларускіх землях. Выступаючыя таксама звярталі ўвагу на тое, што свой дастойны ўклад у Перамогу савецкага народа ў гады Вялікай Айчыннай вайны ўнеслі і ўдзельнікі Першай сусветнай вайны, гістарычную ісціну пра якую трэба аднаўляць і захоўваць.

Кафедра гісторыі славянскіх народаў.