Фінальны этап традыцыйнага ўніверсітэцкага конкурсу «Лепшая вучэбная група»

19 мая 2015 года адбыўся фінальны этап традыцыйнага ўніверсітэцкага конкурсу «Лепшая вучэбная група». На сцэне актавай залы сышліся ў нялёгкай барацьбе інтэлекту і творчасці, адзінства духу і лідарскіх якасцяў самыя годныя прадстаўнікі студэнцтва Брэсцкага дзяржаўнага ўніверсітэта імя А.С. Пушкіна.

Конкурс праходзіў у тры этапы. На першым – вызначалася лепшая група на факультэце. На другім – журы вылучыла 5 лепшых навучальных груп універсітэта, якія дасягнулі найбольш высокіх вынікаў у вучэбнай, навукова-даследчай і пазавучэбнай дзейнасці (грамадскай, творчай, культурна-масавай, спартыўнай, фізкультурна-аздараўленчай).

Трэці этап – фінал. Ён складаўся з 4 заданняў: самапрэзентацыя групы – «Нам пашчасціла вучыцца разам», турнір для стараст – «Прысвячэнне ўніверсітэту», творчы нумар у фармаце «Цюцелька ў цюцельку», а таксама конкурс відэаролікаў (у рамках святкавання 70-годдзя Перамогі савецкага народа ў Вялікай Айчыннай вайне і Года моладзі) – «Студэнцтва за мір».

У нялёгкай барацьбе, з пастаянна зменным лідарам, пераможцам конкурсу стала вучэбная група 4-га курса юрыдычнага факультэта спецыяльнасці «Правазнаўства», якая адправіцца ў экскурсійную паездку па Беларусі. Гэтая ж група стала пераможцам у намінацыі «Лепшы відэаролік».

Астатнія фіналісты конкурсу сталі пераможцамі ў наступных намінацыях:

«Адзінства духу – згуртаванасць каманды» – вучэбная група 4-га курса філалагічнага факультэта (спецыяльнасць «Беларуская філалогія»);

«Перспектыўныя лідары» – вучэбная група 4-га курса сацыяльна-педагагічнага факультэта (спецыяльнасць «Сацыяльна-педагагічная дзейнасць»);

«Разумнікі і разумніцы» – вучэбная група 4-га курса псіхолага-педагагічнага факультэта (спецыяльнасць «Выяўленчае мастацтва і чарчэнне. Народныя мастацкія промыслы»);

«Актыўныя даследчыкі» – вучэбная група 3 курса геаграфічнага факультэта (спецыяльнасць «Турызм і гасціннасць»).

Віншуем усіх удзельнікаў і выказваем падзяку групам падтрымкі, кіраўніцтву факультэтаў і ўніверсітэта, студэнцкаму клубу, прафсаюзнаму камітэту студэнтаў.

Аддзел выхаваўчай працы з моладдзю