Майстар-клас “Беларуская пісанка”

Напярэдадні Вялікадня ў Адукацыйна-асветным цэнтры імя У.Калесніка ў рамках прэзентацыі студэнцкага праекта “Пісанка, маляванка, драпанка…”, падрыхтаванага студэнтамі філалагічнага факультэта 4-га курса Вольгай Дубейка і Кацярынай Смірновай, адбыўся майстар-клас “Беларуская пісанка”, які правяла для ўсіх зацікаўленых старшы выкладчык кафедры тэорыі і методыкі эстэтычнай адукацыі Брэсцкага дзяржаўнага ўніверсітэта, член Саюза мастакоў Беларусі Марына Уладзіміраўна Марчук.

Прысутным было цікава даведацца пра мастацтва аздабляць велікодныя яйкі, пра разнастайныя тэхнікі роспісу беларусаў і іншых славянскіх народаў. Марына Уладзіміраўна паказала, як робяцца пісанкі, а студэнты не толькі назіралі за майстэрствам мастачкі, але і самі паспрабавалі зрабіць пісанку. Гэты, здавалася б, няхітры занятак, якім валодалі нашы бабулі і прабабулі, выклікаў цікавасць з боку студэнтаў і паказаў, як многа душы, таленту і натхнення патрабуе ён.

Сустрэча з Марынай Уладзіміраўнай дазволіла на практыцы адкрыць сэнс слоў пісанка, маляванка, крашанка, драпанка, даведацца пра таямнічую мову арнаменту, далучыцца да самабытнай культуры беларусаў.

Кафедра беларускага мовазнаўства