Адкрыты ўніверсітэцкі конкурс чытальнікаў «Таямніцы слова і думкі – 2016»

26 лютага ў БрДУ імя А.С. Пушкіна прайшоў адкрыты ўніверсітэцкі конкурс чытальнікаў «Таямніцы слова і думкі», прысвечаны 85-годдзю з дня нараджэння выдатнага беларускага паэта, вядомага перакладчыка, вучонага-фалькларыста, крытыка, публіцыста, грамадскага дзеяча Ніла Сымонавіча Гілевіча. Мерапрыемства з’яўляецца традыцыйным, праводзіцца штогадова і ўжо трэці раз арганізоўваецца кафедрай журналістыкі БрДУ.

У конкурсе прынялі ўдзел вучні 3–11 класаў агульнаадукацыйных устаноў горада Брэста, студэнты розных факультэтаў Брэсцкага дзяржаўнага ўніверсітэта і Брэсцкага дзяржаўнага тэхнічнага ўніверсітэта. Пасля адборачнага туру, у якім спрабавалі свае сілы 52 канкурсанты, на фінальным этапе выступілі 33 чытальнікі.

Конкурсная праграма складалася з двух аддзяленняў – выканальніцкага і аўтарскага. У выканальніцкім аддзяленні ўдзельнікі дэкламавалі творы беларускіх, рускіх і ўкраінскіх пісьменнікаў. Журы ацэньвала ўменне стварыць сцэнічны вобраз, выканаўчае майстэрства і тэхніку прамаўлення. У аўтарскім аддзяленні выступоўцы чыталі ўласныя тэксты, а журы найперш улічвала арыгінальнасць і самастойнасць твора, сэнсавую і паэтычную насычанасць, а таксама лагічна-структурную цэласнасць і тэхніку прамаўлення.

У выніку дыпломы першай ступені атрымалі вучаніца 3-га класа СШ № 31 г. Брэста Таркіна Марыя (выканальніцкае аддзяленне) і студэнтка 1-га курса філалагічнага факультэта БрДУ Сільвестрава Таццяна (аўтарскае аддзяленне). А лаўрэатам конкурсу «Таямніцы слова і думкі – 2016» стаў прадстаўнік 11-га класа СШ № 28 г. Брэста Залатар Уладзімір з творам У.Д. Сміта «Если бы у меня была лодка».

Усе канкурсанты фінальнага этапу спаборніцтва ўзнагароджаны дыпломамі, а пераможцы атрымалі і каштоўныя падарункі.

Спадзяёмся, што праз год мы зноў зможам акунуцца ў таямніцы слова і думкі і атрымаць асалоду ад пачутага і ўбачанага.

Аўтар: Міхаіл Радыванюк
Фота: Кацярына Нікіціна, Таццяна Ключ