Клуб «Дыялог культур» запрасіў на Піліпаўскія вечары

«Беларуская гасціннасць у Піліпаўскія вечары» – пад такой назвай у межах працы клуба «Дыялог культур» 9 снежня адбылася вечарына, удзельнікамі якой сталі студэнты філалагічнага, фізіка-матэматычнага, геаграфічнага і біялагічнага факультэтаў, выкладчыкі, старшыня прафкама студэнтаў, госці з гандлева-тэхналагічнага каледжа. У назве вечарыны спалучыліся дзве асаблівасці: а) гасціннасць як асноўная рыса беларусаў і б) Піліпаўскі пост як традыцыя ў беларускай праваслаўнай культуры.

Шанаванне традыцый нашых продкаў, рэканструкцыя святаў і абрадаў, якія былі ўласцівы для беларусаў, з’яўляюцца для сучаснікаў, асабліва для моладзі, падмуркам для фарміравання нацыянальнай самасвядомасці. Арганізатары вечара паставілі мэту – далучыць студэнцкую моладзь да вытокаў беларускай традыцыйнай культуры, у якой святы, абрады, звычаі  продкаў маюць вялікі гуманістычны сэнс.

Вечарына атрымалася творчай і цікавай. Месцам яе правядзення стаў універсітэтскі інтэрнат № 2. Зала не магла змясціць усіх жадаючых прысутнічаць на мерапрыемстве. Прэзентацыя «Кола святаў беларусаў» (аўтар і вядучая - Пальто Ксенія) пазнаеміла нас са святамі беларусаў, якія адзначаліся  на працягу года ў залежнасці ад каляндара і працы на зямлі. Пра Піліпаўскі пост і яго адметнасці паведаміла Бянецкая Аксана. Студэнцкі тэатральны гурток «Ў-нескладовік» (філалагічны ф-т) прадставіў тэатралізацыю «Запрашаем на Піліпаўскія вячоркі». З замілаваннем расказала пра сваю «малую радзіму»,  гісторыю і сучаснасць вескі Моталь Крокун Святлана, зрабіўшы прэзентацыю «Моталь і мотальскія прысмакі».

Нашы продкі заўседы адпачывалі разам з песняй. У песнях раскрывалася душа народа, назвы песень раскрывалі каштоўнасці людзей. Таму наступная частка праграмы вечара мела назву: «Песня і праца побач жывуць!», у якой прагучалі цудоўныя беларускія песні: «Рэчанька», «Весачка мая», «Простыя словы» у выкананні студэнтаў Гапановіч Марыны, сясцер Паўлюкавец Аліны і Крысціны, Шахалевіча Сямена.

Другая дзея вечара перамясцілася ў гасцінную залу, у якой быў арганізаваны Кулінарны фэст «Бабуліны стравы ў Піліпаў пост». Універсітэцкім майстрам кулінарнай справы могуць пазайздросціць нават лепшыя знакамітыя кулінары. Студэнты дэманстравалі лепшыя свае кулінарныя вырабы, расказвалі пра рэцэпты страў. Да фэсту далучыліся навучэнцы гандлева-тэхналагічнага каледжа, сярод якіх будучыя бармэны і прафесійныя павары таксама паказалі свае ўменні ў прыгатаванні страў і сервіроўцы святочнага стала. Мы яшчэ раз пераканаліся, наколькі гасцінны беларускі чалавек, наколькі ен працавіты!

Хочацца выказаць вялікую падзяку ўсім студэнтам, выхавацелям інтэрната, якія ўключыліся ў падрыхтоўку  вечарыны і вельмі добра яе правялі.

Леўчук З.С., дацэнт, кіраўнік клуба «Дыялог культур»