Майстар-клас па рынга

На пляцоўцы Брэсцкага дзяржаўнага ўніверсітэта імя А.С.Пушкіна адбыўся майстар-клас па рынга, які сумесна праводзілі кафедра спартыўных дысцыплін факультэта фізічнага выхавання і сацыяльна-педагагічны факультэт разам з Грамадскім аб’яднаннем “Беларуская федэрацыя рынга”.

У госці да нашых студэнтаў прыехала прадстаўнічая дэлегацыя з Мінску на чале з яе генеральным сакратаром Андрэем Конанам. У складзе дэлегацыі знаходзіліся таксама Павел Чудук (№1 у агульнабеларускім рэйтынгу), Ігар Ярута (№2 у агульнабеларускім рэйтынгу), Аляксей Сташэўскі (№6 у агульнабеларускім рэйтынгу) і Аляксандар Шулякоўскі (№8 у агульнабеларускім рэйтынгу). Сярод гаспадароў таксама знайшліся аматары гэтага віду спорта: Іван Шулькевіч (№ 20 у агульнабеларускім рэйтынгу), а таксама Віталь Іванюк і Павел Цімашук (усе – факультэт фізічнага выхавання).

Пасля ўступнага слова дацэнта кафедры спартыўных дысцыплін, арбітра міжнароднай катэгорыі па рынга Ул.П.Люкевіча адбылася відэапрэзэнтацыя, якая ўключала ў сябе гісторыю ўзнікнення, станаўлення, развіцця і распаўсюджвання гэтай гульні, якая, як аказваецца, знайшла сваё месца ў шмат якіх краінах свету. Затым былі прадэманстраваныя падставовыя правілы гульні і адбыўся паказальны матч “двоек” у выкананні прадстаўнікоў зборнай Беларусі, якія, дарэчы, з’яўляюцца пераможцамі і прызёрамі шматлікіх міжнародных спаборніцтваў. Удзельнікі майстар-класу атрымалі магчымасць паспрабаваць свае сілы ў выканані разнастайных кідкоў, а таксама паўдзельнічаць у міні-турніры па рынга. Такім чынам, на працягу амаль дзвюх гадзін больш за 50 студэнтаў геаграфічнага і сацыяльна-педагагічнага факультэтаў, факультэта замежных моў і факультэта фізічнага выхавання атрымалі дасведчанне ў гэтай цікавай і захапляльнай гульні.

У якасці падсумавання праведзенага мерапрыемства генеральны сакратар ГА “Беларуская федэрацыя рынга” Андрэй Конан сказаў наступнае: “Мы робім шмат намаганняў дзеля папулярызацыі рынга. У 2012 годзе выязджалі ў розныя гарады краіны: Пінск, Смалявічы, Маладзечна. Плануем гэта практыкаваць і надалей, каб узнікла як мага больш пунктаў, дзе б гулялі ў рынга. У Брэсце, дзякуючы намаганням кафедры спартыўных дысцыплін, – цудоўныя перспектывы для развіцця гэтага віду спорта. У вашым горадзе хацелася б правесці і Міжнародны турнір, бо сюды вельмі зручна даязджаць гасцям з Германіі, Літвы, Польшчы, Славакіі і Чэхіі”.

Хрысціна Насульчык,
студэнтка IV курса факультэта замежных моў