Рэгіянальны метадычны семінар “Урок роднай мовы: традыцыйнае і новае”

7 мая 2013 года ў аўдыторыі імя прафесара Г.М.Малажай на філалагічным факультэце адбыўся рэгіянальны метадычны семінар “Урок роднай мовы: традыцыйнае і новае”. Падчас семінара былі актуалізаваны праблемы выкарыстання інавацыйных тэхналогій у сучасным адукацыйным працэсе. Сваімі меркаваннямі падзяліліся выкладчыкі кафедры беларускага мовазнаўства, студэнты, настаўнікі беларускай мовы і літаратуры Берасцейшчыны.

Студэнты-філолагі мелі магчымасць пазнаёміцца з вопытам Галіны Уладзіміраўны Ныч, настаўніцы гімназіі №6 г.Брэста, Жанны Мікалаеўны Казак, настаўніцы гімназіі №1 г.Брэста, Жанны Мікалаеўны Гнуда, настаўніцы СШ №29 г.Брэста. Эфектыўнасць выкарыстання камп’ютарных тэхналогій на ўроках беларускай мовы дэманстравала настаўніца беларускай мовы і літаратуры гімназіі г.Белаазёрска Галіна Васільеўна Скарына.

Знаёмства з вопытам творчых настаўнікаў было для студэнтаў не толькі далучэннем да практыкі гарманічнага спалучэння класічнага ўрока з сучаснымі адукацыйнымі тэхналогіямі, але і своеасаблівым запрашэннем да самаадукацыі, самаразвіцця і рэалізацыі свайго ўласнага творчага патэнцыялу.

Кафедра беларускага мовазнаўства