Рэспубліканская навукова-практычная канферэнцыя “Нацыянальна-культурны кампанент у мастацкай і дыялектнай мове”

18–19 кастрычніка 2012 года на філалагічным факультэце адбылася рэспубліканская навукова-практычная канферэнцыя “Нацыянальна-культурны кампанент у мастацкай і дыялектнай мове”, якую ладзіла кафедра беларускага мовазнаўства. На запрашэнне адгукнуліся вышэйшыя навучальныя ўстановы Беларусі, а таксама прадстаўнікі Нацыянальнай акадэміі навук Беларусі, аспіранты, магістранты, настаўнікі і студэнты, завочны ўдзел прынялі асобныя навукоўцы з Польшчы і Украіны.

Падчас працы канферэнцыі былі абмеркаваны разнастайныя аспекты жыцця роднага слова ў часе і прасторы, самабытнасці слова, ягонай спрадвечнай сувязі з гісторыяй і культурай народа. Асэнсаванне нацыянальна-культурнай спецыфікі беларускага слова засведчыла важнасць выбранай праблемы, выявіла цікавасць да яе даследавання, а таксама неабходнасць далейшага вывучэння таямніцаў роднай мовы ў дыялогу з іншымі мовамі і культурамі.

Удзельнікі канферэнцыі маглі пазнаёміцца з матэрыяламі дзвюх выстаў, якія былі не толькі прыгожым аздабленнем, але i гарманічна адпавядалі тэме навуковага мерапрыемства. Гэта кніжная выстава “Мова. Культура. Народ”, падрыхтаваная бібліятэкай нашага ўніверсітэта, і выстава “Хараство з умелых рук: ручнікі, кераміка” (з прыватнай калекцыі Святланы Варонік). Выставы, размешчаныя ў Адукацыйна-асветным цэнтры У.Калесніка, дзе адбывалiся пленарнае, а пасля і секцыйнае пасяджэнні, выклікалі цікавасць, жаданне растаемніць мову вытканых, вышытых узораў, адкрыць слова, зашыфраванае ў творах матэрыяльнай культуры. Важна  зберагчы Слова ў жывым ягоным гучанні, у непаўторным і таямнічым функцыянаванні ў старажытным і сучасным тэксце, у ягонай повязі з мінулым, у побытавым і дзяржаўным, у духоўным жыцці асобнага чалавека, народа, нацыі.

Кафедра беларускага мовазнаўства