Міжнародны дзень роднай мовы ва ўніверсітэце

21 лютага 2014 года ва ўніверсітэце адбылося святкаванне Міжнароднага дня роднай мовы. Арганізатарамі свята выступілі аддзел выхаваўчай работы з моладдзю, студэнцкі клуб і кафедра педагогікі (кіраўніцтва праекта “Бацькі.by”). У шэрагу мерапрыемстваў прынялі ўдзел студэнты амаль усіх факультэтаў.

Інтэрактыўны перапынак "Размаўляй па-беларуску" распачаўся з прывітання ўсіх студэнтаў і выкладчыкаў беларускай народнай песняй “Рэчанька” ў выкананні Ксеніі Цярэшка, студэнткі 1-га курса псіхолага-педагагічнага факультэта.

У гэты дзень падчас перапынкаў дзяўчаты ў беларускіх строях (студэнткі 1–3-х курсаў філалагічнага факультэта) прапанавалі ўсім жадаючым папрактыкавацца ў перакладзе слоў з рускай мовы на беларускую, адгадаць беларускія загадкі, прачытаць хуткамоўкі, выразна прачытаць вершы на беларускай мове.

На трэцім паверсе ўсіх удзельнікаў мерапрыемства чакаў «смачны» сюрпрыз: там працавала «Страўня». Пераможцы выпрабаванняў інтэрактыўнага перапынку атрымлівалі ад ўдзельнікаў валанцерскага атрада "Свой круг" (пры аддзеле выхаваўчай работы з моладдзю) флаеры, якія давалі мажлівасць пакаштаваць з багатага стала: каравай, наліснікі, пудзінг, блінцы, мельшпэйз, пернікі, булкі, бабы, печыва і ўсялякую дамашнюю здобу, а таксама выпіць гарачай кавы, гарбаты з разнастайнымі лекавымі зелкамі, квас, малако. У страўні працавалі адміністратар В.П.Крусь, афіцыянты Н.Зарэцкая, К.Цабрук, Н.Стасюк і дыджэй С.Шахалевіч.

У фае вучэбнага корпуса №1 дэманстраваліся фільм “Мова родная – мова модная!” і беларускамоўныя мультфільмы. На працягу ўсяго мерапрыемства гучалі як старадаўнія, так і сучасныя беларускія песні.

Усе мерапрыемствы, прысвечаныя Міжнароднаму дню роднай мовы, былі накіраваны на папулярызацыю беларускай мовы, на выхаванне ў моладзі павагі і любові да роднага слова, цікавасці да твораў беларускіх пісьменнікаў і паэтаў.

Аддзел выхаваўчай работы з моладдзю