Творчая сустрэча з пісьменнікамі Берасцейшчыны

На філалагічным факультэце 16 лютага адбылася творчая сустрэча з пісьменнікамі Берасцейшчыны Іванам Мельнічуком, Аляксеем Філатавым, Васілём Дэбішам і Лявонам Валасюком. Прадстаўляў гасцей кандыдат філалагічных навук, дацэнт кафедры беларускага мовазнаўства і дыялекталогіі паэт і перакладчык Мікола Аляхновіч. Ва ўступным слове ён пазнаёміў студэнтаў з пісьменнікамі, распавядаў пра адметнасці іх творчых набыткаў.

Першым з творцаў узяў слова Іван Мельнічук, які адзначыў, што ў свой час закончыў філалагічны факультэт нашай навучальнай установы, вучобу сумяшчаў з працай журналістам у брэсцкай раённай газеце “Заря над Бугом”, многа пісаў на рускай і беларускай мовах. Зараз ён на пенсіі, але актыўна працягвае займацца грамадскай і творцай дзейнасцю. Іван Міхайлавіч прачытаў прысутным некалькі мініяцюр, адрасаваных дзецям, а таксама пазнаёміў з пародыямі на творы сяброў-паэтаў.

Аляксей Філатаў таксама выпускнік філалагічнага факультэта нашага ўніверсітэта. Ён расказаў прасутным пра свой складаны жыццёвы лёс: смерць мамы ў першы дзень вайны, канцэнтрацыйны лагер для маленькіх дзяцей. Пісьменнік прачытаў свой новы твор, напісаны на аснове ўласнага жыццёвага матэрыялу.

Васіль Дэбіш прадэкламаваў вершы любоўнай тэматыкі, якія выклікалі ў слухачоў вялікую цікавасць. Ён паведаміў, што, магчыма, у хуткім часе прыйдзе зноў у госці да філфакаўцаў у сувязі з мяркуемым выхадам новай паэтычнай кнігі.

Лявон Валасюк выпускнік школы № 16, у якой доўгі час працавала Заслужаная настаўніца Беларусі А.В. Башчук. Яна прывіла свайму вучню вялікую любоў да беларускага слова, нацыянальнай гісторыі і культуры. Менавіта таму, архітэктар па адукацыі, Л. Валасюк актыўна займаецца літаратурнай творчасцю: піша вершы, аповесці, раманы.

Мікола Аляхновіч не абмежаваўся толькі мадэратарствам – ён прачытаў уласныя вершы і пераклады з іншых еўрапейскіх моў.

Прысутныя мелі магчымасць набыць кнігі пісьменнікаў, атрымаць іх аўтографы.

Тэкст і фота Уладзіміра Сенькаўца