Рэспубліканскі семінар-практыкум тэатральнага майстэрства «Фарміраванне творчай асобы сродкамі тэатральнага жанра» у Баранавічах

Студэнцкі тэатр… Колькі незабыўных імгненняў, цікавых роляў, прэм’ераў і рэпетыцый! У тэатры закладваюцца фундамент будучай тэатральнай культуры, фарміруецца асоба будучага грамадзяніна нашай краіны – са сваімі эстэтычнымі густамі і зацікаўленнямі. Тэатральная студыя філалагічнага факультэта «Эпізод Ў-нескладовік» пад кіраўніцтвам С.М. Шчэрбы аб’ядноўвае студэнтаў з першага па пяты курс. Гэта тыя, хто сапраўды любіць тэатр, не можа жыць без яго, хто марыць выступаць на сцэне. 1 сакавіка тэатральная студыя мела мажлівасць пабываць і паўдзельнічаць у Рэспубліканскім семінары-практыкуме «Фарміраванне творчай асобы сродкамі тэатральнага жанра».

З поспехам тэатралы паказалі сваё майстэрства ў пастаноўцы спектакля «Рагнеда» паводле твораў У. Караткевіча. Зала ўзрушана ўспрыняла тэатралізацыю філалагічнага факультэта і доўга не адпускала сваімі апладысментамі. Студэнты таксама мелі мажлівасць прыняць удзел у разнастайных трэнінгах, майстар-класах, бліц-конкурсах тэатральнага мастацтва. Лізавета Домніч атрымала галоўны прыз «Тэатральная маска» ў конкурсе крэатыўных эцюдаў.

Напрыканцы семінара-практыкума кіраўнік тэатральнай студыі «Эпізод Ў-нескладовік» С.М. Шчэрба пазнаёміла ўдзельнікаў з прэзентацыяй творчай дзейнасці студыі.

С.М. Шчэрба,
кандыдат філалагічных навук, дацэнт кафедры беларускага літаратуразнаўства,
кіраўнік тэатральнай студыі «Эпізод Ў-нескладовік»

Фотаздымкі – прэс-цэнтр БарДУ