Прэзентацыя кнігі М.І.Пашкевіча “У родным слове адгукаецца душа…”

У рамках навукова-практычнага семінара “Мова роднай вёскі: да праблемы актывізацыі даследча-пошукавай працы студэнтаў і вучняў” адбылася прэзентацыя кнігі старшага выкладчыка кафедры беларускага мовазнаўства Мікалая Іванавіча Пашкевіча “У родным слове адгукаецца душа…”. Гэтая кніга працягвае ўнікальны вопыт стварэння ў слове падзякі роднай сялібе – “поселі”, маці, бацьку, роду, вяскоўцам-землякам, Радзіме. Прысутныя пачулі аповяд аўтара пра мінулае і сучаснае вёскі Рубель, ахрышчанай Уладзімірам Караткевічам як “наш Кітай”.

Паказ слайдаў – ваколіцаў Рубля, краявідаў адметнай ракі Чаквы, моста, храмаў – суправаджаўся каментарыем М.І.Пашкевіча, аповядам пра дарагія сэрцу знакі-вобразы Рубля – хутары, калодзеж, паром, чайную, малачарню, кладкі – тыя вобразы, якія, на жаль, незваротна знікаюць ці зніклі з ваколіцаў Рубля, аднак засталіся ў душы аўтара і жыва паўстаюць у ягоных абразках. Такой жывасці, каларыту дасягае аўтар дзякуючы таму, што на старонках гэтае кнігі гарманічна і самавіта жыве роднае, матчына слова, слова рубельцаў.

Сваім адкрыццём гэтай кнігі падзялілася дацэнт кафедры агульнага і рускага мовазнаўства Галіна Васільеўна Пісарук. У выкананні студэнтаў філалагічнага факультэта прагучалі мініяцюры М.І.Пашкевіча – своеасаблівыя філалагічныя эцюды, у якіх адкрываецца багацце жывога народнага слова, а ў ім – і вобраз, і ацэнка, назіральнасць і досціп, дарагі ўспамін і навука. Для ўдзельнікаў семінара цікава было пачуць слова саміх “рубэльцаў”. Так, цікавыя факты пра Рубель, а таксама высокую ацэнку кнігі М.І.Пашкевіча пачулі прысутныя ў выступленні доктара гістарычных навук, прафесара, загадчыка кафедры гісторыі славянскіх народаў Аляксандра Мікалаевіча Вабішчэвіча. Студэнткі 5-га курса філалагічнага факультэта Ганна Пашкевіч і Наталля Пашкевіч (Скрабец) прэзентавалі рубельскі лексіка-фразеалагічны слоўнік, складзены М.І.Пашкевічам.

Прэзентацыя кнігі “У родным слове адгукаецца душа …” выклікала ў студэнтаў і выкладчыкаў захапленне здзейсненай М.І.Пашкевічам працай, абудзіла жаданне збіраць і захоўваць жывое народнае слова, у якім – гісторыя, культура, мараль нашых продкаў. Гэтая кніга, бясспрэчна, зацікавіць вучоных-славістаў і, вядома, саміх рубельцаў.

Кафедра беларускага мовазнаўства