Абласны семінар рэдактараў СМІ Берасцейшчыны і выкладчыкаў кафедры журналістыкі

11 снежня 2015 года на філалагічным факультэце адбыўся абласны семінар «Аб падрыхтоўцы журналісцкіх кадраў і павышэнні прафесійнага майстэрства». Арганізатары мерапрыемства – кафедра журналістыкі і галоўнае ўпраўленне ідэалагічнай працы, культуры і па справах моладзі Брэсцкага аблвыканкама. Удзельнікамі семінара сталі прадстаўнікі ўпраўлення, выкладчыкі кафедры, рэдактары і вядучыя журналісты друкаваных СМІ Брэста і Брэсцкай вобласці.

Вітаючы ўдзельнікаў, дэкан філалагічнага факультэта Вольга Фелькіна адзначыла важнасць падобных сустрэч, у выніку якіх карэктуецца стратэгія ўзаемадзеяння факультэта і патэнцыйных працадаўцаў. Загадчык кафедры журналістыкі Людміла Скібіцкая акрэсліла асноўныя напрамкі супрацоўніцтва кафедры і рэдакцый як у працэсе падрыхтоўкі спецыялістаў, так і ў пытаннях іх далейшага працаўладкавання.

Начальнік аддзела па працы са СМІ галоўнага ўпраўлення ідэалагічнай працы, культуры і па справах моладзі аблвыканкама Вадзім Ляўковіч азнаёміў удзельнікаў семінара з вынікамі анкетавання, праведзенага сярод маладых журналістаў рэгіёна. Пытанні анкеты былі звязаны са спецыфікай працэсу падрыхтоўкі студэнтаў-журналістаў і аспектамі практычнай дзейнасці маладых журналістаў.

Выступаючы ў дыскусіі, Аляксандр Лагвіновіч, галоўны рэдактар абласной газеты «Зара», на базе якой створаны філіял кафедры журналістыкі, засяродзіў увагу ўдзельнікаў на важнасці практычнага складніка ў працэсе падрыхтоўкі спецыялістаў і на неабходнасці стварэння школы настаўніцтва ў рэгіёне.

Галоўны рэдактар Ганцавіцкай раённай газеты «Савецкае Палессе» Павел Свістуновіч прапанаваў выкарыстоўваць персаналізаваны падыход у ажыццяўленні вытворчай практыкі студэнтаў-журналістаў з перспектывай іх далейшага працаўладкавання.

Загадчык аддзела Баранавіцкай газеты «Наш край» Святлана Гіль таксама акцэнтавала значнасць ролі журналістаў-настаўнікаў у працэсе адаптацыі маладых спецыялістаў да спецыфікі працы ў рэдакцыі.

У семінары прынялі ўдзел і выпускнікі спецыяльнасці «Журналістыка (друкаваныя СМІ)» Ганна Івашчанка, Дзмітрый Босак і Вольга Кавалько. Маладыя журналісты адзначылі, што атрымалі ва ўніверсітэце добрую тэарэтычную базу, якая дазваляе ім у цэлым паспяхова ажыццяўляць прафесійную дзейнасць.

На семінары былі акцэнтаваны надзённыя праблемы падрыхтоўкі і працаўладкавання спецыялістаў-журналістаў, скарэкціраваны напрамкі супрацоўніцтва паміж факультэтам, кафедрай і рэдакцыямі друкаваных СМІ. Было прынята рашэнне вярнуцца да абмеркавання заяўленых пытанняў на майскім навукова-практычным семінары «Рэгіянальныя СМІ ў сучаснай медыйнай прасторы».

Кафедра журналістыкі