Абласны семінар-злёт прафактыву прайшоў на базе ўніверсітэта

25 верасня 2015 года на базе Цэнтра экалогіі нашага ўніверсітэта прайшоў семінар-злёт прафсаюзнага актыву Брэсцкай вобласці. У працы семінара прыняў удзел В.А. Харытановіч, старшыня Брэсцкага абласнога камітэта Беларускага прафесійнага саюза работнікаў адукацыі і навукі.

Падчас працы семінара кіраўнік галіновага прафсаюза вобласці В.А. Харытановіч уручыў пасведчанні лаўрэатаў аднаразовай заахвочвальнай выплаты Брэсцкага абкама прафсаюза навучэнцам з ліку прафсаюзных актывістаў. Лаўрэатамі ад нашага ўніверсітэта сталі студэнты-актывісты сацыяльна-педагагічнага факультэта (Вольга Дубінка, 5 курс) і біялагічнага факультэта (Васіль Сілюк, 3 курс).

У рамках мерапрыемства прагучалі даклады старшыні прафкама студэнтаў Р.В. Чуля «З вопыту працы прафкама студэнтаў УА «БрДУ імя А.С. Пушкіна» з прафбюро факультэтаў па ажыццяўленні арганізацыйна-статутнай дзейнасці. Узаемадзеянне прафкама і рэктарата ў пытаннях забеспячэння сацыяльна-эканамічных правоў студэнтаў» і Г.А. Вахільчук «Практыка працы прафбюро студэнтаў геаграфічнага факультэта. Узаемадзеянне прафбюро факультэта з дэканатам».

Пасля афіцыйнай часткі ў Зімовым садзе адбылася займальная і цікавая экскурсія.

Педагог-псіхолаг сацыяльна-педагагічнай і псіхалагічнай службы ўніверсітэта А.М. Макарук правяла для прафактыву студэнтаў вобласці трэнінг «Як упэўнена трымаць сябе на публіцы?», а намеснік старшыні абкама галіновага прафсаюза А.А. Драпей арганізавала семінар для старшыняў прафсаюзных камітэтаў навучэнцаў вышэйшых і сярэдніх спецыяльных навучальных устаноў Брэсцкай вобласці.

Брэсцкі абласны камітэт і прафкам студэнтаў дзякуюць кіраўніцтву ўніверсітэта за магчымасць правядзення семінара-злёту ў сценах Установы адукацыі «Брэсцкі дзяржаўны ўніверсітэт імя А.С. Пушкіна».

Р.В. Чуль,
старшыня прафкама студэнтаў