Адкрыты міжфакультэцкі конкурс «Грамацей-2014»

30 верасня 2014 года адбыўся чарговы адкрыты міжфакультэцкі конкурс «Грамацей-2014», які штогод арганізуецца кафедрай агульнага і рускага мовазнаўства. Удзельнікамі конкурсу сталі 27 студэнтаў філалагічнага, фізіка-матэматычнага і псіхолага-педагагічнага факультэтаў і факультэта замежных моў, а таксама 23 вучні шасці гімназій і двух ліцэяў горада.

У гэтым годзе конкурс быў прысвечаны 150-годдзю з дня нараджэння выдатнага рускага лінгвіста А.А.Шахматава. Студэнткі IV курса Алеся Сіманоўская і Ганна Пакала падрыхтавалі кароткае паведамленне і мультымедыя-прэзентацыю пра акадэміка А.А.Шахматава. З цікавасцю выслухалі ўдзельнікі конкурсу і паведамленне студэнткі IV курса Вольгі Каліноўскай аб самых новых арфаграфічных слоўніках, якія ёсць ва ўніверсітэце.

Конкурсная праграма складалася з двух этапаў: дыктоўка (па тэксце прыпавесці П.Каэльа «Тры кедры») і карэктурнае заданне (выпраўленне арфаграфічных і пунктуацыйных памылак).

У выніку сярод студэнтаў філалагічнага факультэта 1-е месца заняла Аліна Пілецкая (III курс), 2-е месца – у Ірыны Некрашэвіч (IV курс), 3-е – у Анастасіі Румак (II курс).

Сярод студэнтаў іншых факультэтаў 1-е месца заняла Яна Крылова (факультэт замежных моў, І курс); 2-е месца – Анастасія Дзямчук (факультэт замежных моў, І курс), 3-е месца – Юлія Шаўчук (фізіка-матэматычны факультэт, V курс).

Сярод школьнікаў упэўненым лідарам стаў Дзмітрый Суганяеў (гімназія №1), на 2-м месцы – Ксенія Якоўчыц (ліцэй №1), 3-е месца падзялілі Марта Велінец (гімназія №6) і Алеся Палейка (гімназія №2).

Пасля конкурсу для школьнікаў была арганізавана экскурсія па факультэце з выступленнем агітбрыгады студэнтаў IV курса.

Кафедра агульнага і рускага мовазнаўства