Адкрыты ўніверсітэцкі конкурс прамоўніцкага майстэрства «Майстар слова – 2016»

4 мая 2016 года адбыўся адкрыты ўніверсітэцкі конкурс прамоўніцкага майстэрства «Майстар слова – 2016». Зарадзіўшыся ў рамках Дзён славянскага пісьменства на філалагічным факультэце, гэты праект стаў універсітэцкім і нават выйшаў за межы нашай альма-матар. Конкурс «Майстар слова» з’яўляецца адным з брэндаў Брэсцкага дзяржаўнага ўніверсітэта імя А.С. Пушкіна. У арганізацыі конкурсу прымаюць удзел кафедра агульнага і рускага мовазнаўства, аддзел выхаваўчай працы з моладдзю, студэнцкі клуб і прафкам студэнтаў універсітэта. Задача конкурсу – выявіць сярод навучэнцаў найлепшых майстроў-выступоўцаў, якія валодаюць уменнямі публічна выступаць на зададзеную тэму і канструктыўна адстойваць свае погляды.

Удзельнікамі конкурсу, што сёлета праходзіў у 13 раз, сталі 19 студэнтаў сямі факультэтаў БрДУ, а таксама вучні двух ліцэяў, чатырох гімназій і сярэдняй школы № 1 г. Брэста.

Конкурс праходзіў у тры этапы. На першым этапе ўдзельнікі выступілі з загадзя падрыхтаванай публічнай прамовай на тэму «Зробім свет лепшым». Выступленні канкурсантаў нікога не пакінулі абыякавымі, кожны з удзельнікаў, як сапраўдны прамоўца, быў пераканальны ў сваіх доказах. Усе канкурсанты паказалі ўменне працаваць са слухачамі, зала актыўна падтрымлівала выступоўцаў.

У фінал выйшлі 12 чалавек. Іх чакала нялёгкая барацьба ў яшчэ двух конкурсах.

У другім туры ўдзельнікі ў рэжыме нон-стоп чыталі першую прамову Цыцырона супраць Катыліны. Фіналісты прадэманстравалі сваё ўменне выразна чытаць тэкст. Прагучаў таксама арыгінальны ўрывак прамовы на лацінскай мове.

Трэці конкурс «Ці пагаджуся з мудрацом?» праходзіў ў рэжыме рыторыкі хуткага рэагавання. Неабходна было аргументавана аспрэчыць або пагадзіцца з прапанаванымі афарызмамі старажытнагрэчаскіх і старажытнарымскіх філосафаў і выступоўцаў.

Пераможцамі конкурсу сталі

• сярод студэнтаў:
  • 1-е месца – Гусева Аляксандра (факультэт замежных моў),
  • 2-е месца – Брышцен Таццяна (юрыдычны факультэт),
  • 3-е месца – Кудынюк Дар’я (філалагічны факультэт), Нічыпарук Вольга (юрыдычны факультэт), Прывядзенец Аліна (фізіка-матэматычны факультэт).
• сярод школьнікаў:
  • 1-е месца – Кажамячанка Павел (гімназія № 2),
  • 2-е месца – Туцкі Дзмітрый (абласны ліцэй імя П.М.  Машэрава),
  • 3-е месца – Асадава Валіда (ліцэй № 1 г. Брэста імя А.С. Пушкіна).

Уладальнікам прыза глядацкіх сімпатый стаў студэнт юрыдычнага факультэта Мешчанчук Уладзіслаў. Акрамя таго, у намінацыі «Адданасць роднаму слову» адзначана студэнтка філалагічнага факультэта Багацеева Яўгенія, у намінацыі «Яркае майстэрства» ўзнагароду атрымала Лінік Надзея, студэнтка псіхолага-педагагічнага факультэта, а намінацыя «Акцёрскае майстэрства» была прысуджана студэнту філалагічнага факультэта Віркоўскаму Даніілу.

Віншуем пераможцаў! Дзякуючы гэтаму святу красамоўства мы зноў здзівіліся бясконцым магчымасцям роднай мовы.

Як і ў папярэднія гады, у пераможцаў конкурсу «Майстар слова» ёсць магчымасць прадставіць наш універсітэт на Міжнародным конкурсе прамоўніцкага майстэрства «Цыцыроній-2016», што праводзіцца ў Акадэміі МУС Рэспублікі Беларусь.

Кафедра агульнага і рускага мовазнаўства