«Адзін свет – адна мара»

«Адзін свет – адна мара!» – пад такім дэвізам 1 верасня прайшла ўрачыстая лінейка для першакурснікаў нашага ўніверсітэта. Канцэпцыяй для свята быў абраны фармат Алімпійскіх гульняў, і прычын таму шмат. Юніёры-студэнты, як і ўдзельнікі адной з галоўных падзей года – Алімпійскіх гульняў у Рыа, гэтым летам праходзілі кваліфікацыйныя ўступныя выпрабаванні. Пераступіўшы парог універсітэта, кожны з іх удзельнічае ў спаборніцтвах у гнуткасці розуму, камунікатыўнай лоўкасці, фізічнай вынослівасці, творчасці і многім іншым. Усе першакурснікі, як і спартсмены, аб’яднаны адной мэтай – дасягнуць сваіх вышынь, устанавіць новыя рэкорды ў вучэбным і пазанавучальным жыцці.

Ганаровае права падняць алімпійскі ўніверсітэцкі сцяг пад гукі гімна было даверана: Марыне Самкевіч, студэнтцы 1 курса факультэта фізічнага выхавання, прызёру першынства Еўропы па спартыўнай акрабатыцы, майстру спорту Рэспублікі Беларусь міжнароднага класа, і Адаму Нікалаевічу, студэнту 1 курса гістарычнага факультэта, пераможцу 3-га этапу Рэспубліканскай алімпіяды па гісторыі.

Рэктар універсітэта, доктар педагагічных навук, прафесар Г.М. Сендзер павітала першакурснікаў і пажадала ім перамог у атрыманні ведаў, творчасці, спартыўных спаборніцтвах. Ганна Мікалаеўна адзначыла, што рабяты могуць развіваць свае таленты ў розных секцыях, студыях і гуртках, што працуюць у нашым універсітэце.

Пацвярджэннем гэтаму сталі выступленні спартыўных і творчых «зорак» нашай альма матар, сярод якіх чэмпіёнкі Рэспублікі Беларусь па спартыўнай аэробіцы, майстры спорту, студэнты факультэта фізічнага выхавання Валерыя Болдырава і Ганна Аляксюк (трэнер – Л.С. Цітова), вакалісты студыі «Ступені» (кіраўнік – Л.І. Борсук) і выхаванцы студыі эстрадных танцаў «One Way» (кіраўнік – Ю.Д. Мартынюк).

Наперадзе ў рабят мноства цікавых адкрыццяў і перамог. Пажадаем ім поспеху і ў добры шлях!

Студэнцкі клуб