«Да новых сустрэч на філалагічным ...»

12 сакавіка 2015 года адбылася сустрэча з вучнямі 7-га і 10-га класаў сярэдняй школы №9 г. Брэста. Гэтая сустрэча была адным з серыі прафарыентацыйных мерапрыемстваў, якія ў гэтым навучальным годзе праводзіць кафедра агульнага і рускага мовазнаўства: 20 кастрычніка 2014 г. нашымі гасцямі былі прадстаўнікі САШ №13, 28 кастрычніка – САШ №30, 25 лістапада на факультэце сустракалі вучняў САШ №30, а 12 лістапада – САШ №7. Прыемна, што ў падрыхтоўцы гэтага мерапрыемства прымала ўдзел і студэнтка, якая праходзіць педагагічную практыку ў якасці настаўніка рускай мовы і літаратуры ў САШ №9.

Сустрэча пачалася ў Асветніцка-адукацыйным цэнтры імя У.А. Калесніка. Увазе школьнікаў прапанавалі невялікае выступленне студэнцкай агітбрыгады (навучэнцы расказалі пра гісторыю, традыцыі факультэта і яго вядомых выпускнікоў, пра студэнцкае жыццё філфакаўцаў), а таксама знаёмства з некаторымі фактамі біяграфіі аднаго з першых прафесараў універсітэта, педагога, пісьменніка, вядомага літаратуразнаўца, удзельніка партызанскага руху ў час Вялікай Айчыннай вайны – Уладзіміра Андрэевіча Калесніка. Размову працягнула дэкан Вольга Антонаўна Фелькіна і расказала пра тое, чым жыве сучасны філалагічны факультэт. Для будучых абітурыентаў таксама правялі невялікую экскурсію па факультэце.

Бачыцца, што сустрэчы ў такім фармаце больш эфектыўна праводзіць з вучнямі менавіта невыпускных класаў. І кожны раз, развітваючыся са сваімі гасцямі, мы гаворым ім: «Да новых сустрэч на філалагічным...»

Кафедра агульнага і рускага мовазнаўства