Дні славянскага пісьменства і культуры

З 4 па 28 мая на філалагічным факультэце праходзілі Дні славянскага пісьменства і культуры – свята духу і літары, непарыўна звязанае з імёнамі Кірылы і Мяфодзія, настаўнікаў славянскіх. Праграма мерапрыемстваў уключала ў сябе брэйн-рынг «Дзеля славы славянскага слова», конкурс выразнага чытання «Да мікрафона!», круглы стол з замежнымі студэнтамі «Я – выпускнік філфака БрДУ імя А.С. Пушкіна», відэалекторыі «Выдатныя філолагі-славісты», сустрэчу-прэзентацыю «Традыцыі ўсходніх славян», выязны семінар-практыкум па РКІ «Культурная спадчына Беларусі: Нямцэвічы», прагляд фільма «Памятае неба» пра першага Героя Беларусі лётчыка У. Карвата і сустрэчу з рэжысёрам гэтага фільма Вольгай Семянюк.

У гэтым годзе Дні славянскага пісьменства і культуры адкрыліся XIII агульнаўніверсітэцкім конкурсам «Майстар слова». Абсалютным пераможцам конкурсу на гэты раз стала студэнтка першага курса факультэта замежных моў Аляксандра Гусева.

Думаючы пра вялікую асветніцкую місію Кірылы і Мяфодзія, услаўляючы іх дзецішча – славянскую азбуку, нельга не расказаць пра кнігі, што нікуды не зніклі і не знікнуць, таму што людзі, якія іх стварылі, з’яўляюцца транслятарамі тысячагадовай традыцыі асветы, асэнсоўвання, акультурвання славян. Пра гэта гаварылі студэнты ў газеце «Кніга ў нашым жыцці», выступаючы на «круглых сталах» у абласной і гарадской бібліятэках, трымаючы ў руках старадаўнія фаліянты (за гэта асобная падзяка бібліятэкарам Віялене Казаковай і Ірыне Фаміной) і пераконваючыся, што сапраўды «ў пачатку было Слова…» Гэтыя радкі Евангелля ад Іаанна па-асабліваму загучалі ў літаратурна-музычнай кампазіцыі, якую падрыхтавалі філфакаўцы пад кіраўніцтвам старшага выкладчыка Г.А. Верамяюк. У гэтым заключным акордзе нашага свята аб’ядналіся чыстыя галасы хору Свята-Мікалаеўскай царквы (рэгент Ангеліна Мікалаеўна Дзяйнека), мудрасць клірыка гэтай жа царквы айца Алексія і шчырасць нашых студэнтаў, якія чыталі радкі на славянскіх мовах.

Нельга не працытаваць некалькі выразаў з сінквейнаў, якія склалі студэнты спецыяльнасці «Руская філалогія»: «Слова дзіўнае, вялікае; радуе, засмучае, вучыць; чалавек – нішто без слова» (Зелянко Таццяна, 1 курс), «Слова аб’ядноўвае, раз’ядноўвае; уз’ядноўвае, збліжае, крыўдзіць; слова – гэта маё багацце» (Амірава Альфія, 1 курс), «Слова шчырае, глыбокае; кранае, выпраўляе, натхняе; не дае апусціць рукі» (Гніцэвіч Святлана, 4 курс).

Сардэчная падзяка ўсім нашым выкладчыкам, якія самааддана працуюць дзеля славы Слова, нашым гасцям і студэнтам, для настаўлення якіх і былі прыкладзены гэтыя намаганні.

Н.М. Гурына,
кандыдат філалагічных навук,
дацэнт кафедры агульнага і рускага мовазнаўства