Дзень адчыненых дзвярэй Упраўлення Следчага камітэта Рэспублікі Беларусь па Брэсцкай вобласці

17 лютага 2022 года ва Упраўленні Следчага камітэта Рэспублікі Беларусь па Брэсцкай вобласці прайшоў дзень адчыненых дзвярэй для студэнтаў юрыдычнага факультэта ўстановы адукацыі “Брэсцкі дзяржаўны ўніверсітэт імя А.С. Пушкіна”.

Нагодай для правядзення мерапрыемства стала падпісанне рэктарам універсітэта Ганнай Мікалаеўнай Сендзер і начальнікам Упраўлення Следчага камітэта Рэспублікі Беларусь па Брэсцкай вобласці Дзмітрыем Уладзіміравічам Канаплянікам дамовы пра супрацоўніцтва і стварэнне на базе Упраўлення філіяла адной з кафедраў юрыдычнага факультэта.

У ходзе дыялогу Ганна Мікалаеўна падкрэсліла важнасць супрацоўніцтва са Следчым камітэтам для практыкаарыентаванай падрыхтоўкі сучасных спецыялістаў. Яна адзначыла, што ўзаемадзеянне з Упраўленнем Следчага камітэта Рэспублікі Беларусь па Брэсцкай вобласці мае добрыя традыцыі і сённяшняе мерапрыемства стала лагічным яго працягам.

Дзмітрый Уладзіміравіч, у сваю чаргу, акцэнтаваў увагу на тым, што падобныя мерапрыемствы дапамагаюць будучым юрыстам сфарміраваць больш яркае ўяўленне пра асаблівасці прафесіі следчага.

Студэнты і кіраўніцтва ўніверсітэта наведалі палігон і прынялі ўдзел у разборы практычных сітуацый на месцы здарэння, пазнаёміліся са спецыяльнай тэхнікай і сучаснымі магчымасцямі правядзення следчых дзеянняў. У працэсе зносін з супрацоўнікамі Упраўлення Следчага камітэта Рэспублікі Беларусь па Брэсцкай вобласці студэнты змаглі атрымаць адказы на пытанні пра асаблівасці нясення службы ў органах папярэдняга следства.

Усе ўдзельнікі мерапрыемства адзначылі, што фармат узаемадзеяння студэнтаў і прадстаўнікоў арганізацый-заказчыкаў кадраў у ходзе дзён адчыненых дзвярэй вельмі цікавы і такія сустрэчы маюць важнае значэнне на этапе адаптацыі да прафесійнай дзейнасці.