Форум рэктараў універсітэтаў Беларусі і Кітая: перспектывы развіцця

Рэктар установы адукацыі «Брэсцкі дзяржаўны ўніверсітэт імя А.С. Пушкіна» Ганна Мікалаеўна Сендзер прыняла ўдзел у форуме рэктараў універсітэтаў Беларусі і Кітая, што адбыўся 26 чэрвеня 2017 года на базе ўстановы адукацыі «Беларускі дзяржаўны ўніверсітэт інфарматыкі і радыёэлектронікі» і быў накіраваны на рэалізацыю ініцыятывы «АДЗІН ПОЯС, АДЗІН ШЛЯХ» у сферы адукацыі – аб’яднанне адукацыйнага і навуковага патэнцыялу Беларусі і Кітая».

У мерапрыемстве прынялі ўдзел Міністры адукацыі РБ і КНР І.В. Карпенка і Чэнь Баашэн, Надзвычайны і паўнамоцны пасол КНР у РБ Цуй Цымін, а таксама рэктары і прадстаўнікі 11 кітайскіх і 10 беларускіх устаноў вышэйшай адукацыі.

Удзельнікі форуму праявілі актыўную цікавасць і жаданне да ўмацавання двухбаковых сувязей у галіне адукацыі, навукова-даследчай і культурна-асветніцкай дзейнасці паміж вышэйшымі навучальнымі ўстановамі абедзвюх краін. 

У прыватнасці, прадстаўнікі дзяржаўнага ўніверсітэта ў Сіньсяне ў правінцыі Хэнань (Henan Normal University) выказалі імкненне і гатоўнасць устанавіць цесныя сувязі з нашым універсітэтам і наладзіць доўгатэрміновае супрацоўніцтва ў пытаннях распрацоўкі і рэалізацыі сумесных праграм у галіне прафесійнай вышэйшай адукацыі, магістарскай падрыхтоўкі і навуковых даследаванняў. Падчас гутаркі Г.М. Сендзер з прадстаўнікамі кітайскай ВНУ стала відавочна, што ў нашых навучальных устаноў ёсць шмат агульнага, уключаючы шматгадовую гісторыю існавання абедзвюх ВНУ і вядучую ролю, якую яны маюць у сваіх рэгіёнах.

Кіраўнікі абодвух універсітэтаў выказалі надзею, што будучыя дамоўленасці адкрыюць шырокія магчымасці і перспектывы для актывізацыі супрацоўніцтва паміж нашымі ВНУ.

Хацько Н.А., старшы выкладчык кафедры англійскай філалогіі