Каардынацыйная сустрэча TEMPUS - CoMоLTE

8-9 кастрычніка 2014 года ў Брэсцкім дзяржаўным універсітэце імя А.С. Пушкіна на факультэце замежных моў адбылася каардынацыйная сустрэча ў межах праекта TEMPUS “Consortium for Modern Language Teacher Education”. У гэтай сустрэчы прынялі ўдзел каардынатары, якія прадстаўлялі ўніверсітэты-партнёры: БрДУ імя А.С. Пушкіна (Беларусь), БДУ (Беларусь), Інстытут нямецкіх даследаванняў (IfD), Універсітэт імя Людвіга-Максіміліяна (Германія), Універсітэт Даларна (Швецыя), Універсітэт замежных моў (Азербайджан). На сустрэчы былі падведзены вынікі першага этапу рэалізацыі праекта, абмяркоўвалася тэматычнае напаўненне модуляў, аптымальная структура вучэбных планаў магістарскай праграмы з улікам нацыянальнай спецыфікі адукацыйных сістэм дзяржаў-удзельнікаў праекта, магчымасці on-line-узаемадзеяння ўніверсітэтаў-партнёраў, а таксама план работы на 2015 год.

Мерапрыемствы ў межах праекта CoMоLTE цікавыя не толькі для выкладчыкаў факультэта замежных моў БрДУ, але і для студэнтаў, якія ўжо на пачатковым этапе актыўна ўключыліся ў працу. Так, у верасні-кастрычніку 2014 года студэнты 207 групы пад кіраўніцтвам А.А. Бурава, старшага выкладчыка кафедры нямецкай філалогіі, удзельнічалі ў міжнародным пілотным праекце “Анімацыі ў граматыцы нямецкай мовы”, мэтай якога была апрабацыя вучэбна-метадычных і дыдактычных матэрыялаў, распрацаваных доктарам Феранам Зюнье (Ferran Suner ) (Універсітэт імя Людвіга-Максіміліяна Мюнхен (Германія). Гэтыя матэрыялы прадстаўлены ў выглядзе камп’ютарных анімацый, пры дапамозе якіх можна сфакусіраваць увагу студэнтаў на семантыцы і вобразнасці граматычных з’яў. Анімацыйныя матэрыялы з’яўляюцца метадычным дапаможнікам для комплекснай трэніроўкі ўвагі і ўдасканалення лінгвістычнай кампетэнцыі тых, хто вывучае нямецкую мову як замежную. Прадстаўленае такім чынам камунікатыўна-арыентаванае навучанне граматыцы дазваляе павысіць матывацыю, а таксама пашырае экспрэсіўныя магчымасці маўлення і надае натуральнасць выказванням навучэнцаў у вучэбных умовах.

Кафедра нямецкай філалогіі