Кафедра – школа: ад тэорыі да практыкі

13 снежня 2019 года на філалагічным факультэце адбыўся традыцыйны гарадскі вучэбна-метадычны семінар «Кафедра – школа: ад тэорыі да практыкі». У мерапрыемстве ўзялі ўдзел выкладчыкі кафедры рускай літаратуры і журналістыкі і настаўнікі сярэдніх агульнаадукацыйных устаноў Брэста і вобласці.

Праблемнае поле семінара склалі наступныя пытанні: іміджавыя стратэгіі сучаснай філалагічнай адукацыі, кадравае забеспячэнне адукацыйных устаноў Брэста, праблемы падрыхтоўкі навукова-даследчых работ вучняў і інш.

У межах семінара прайшоў круглы стол «Шляхі і формы прафарыентацыйнай працы з навучэнцамі», дзе абмяркоўваліся перспектывы філалагічнай адукацыі ў сучасным грамадстве. Падчас гутаркі былі выпрацаваны прапановы па актуалізацыі асноўных напрамкаў прафесійнага самавызначэння навучэнцаў.

Таксама праграма семінара ўключала адкрытае пасяджэнне інтэлектуальнага клуба «Дэбаты» «Пушкін – наша ўсё», у межах якога навучэнцы Брэсцкага абласнога ліцэя імя П. М. Машэрава разам са студэнтамі філалагічнага факультэта ў гульнявой форме спасцігалі майстэрства вядзення дыскусіі. Больш пераканаўчымі былі аргументы каманды студэнтаў, якая і стала пераможцам дэбатаў.

Завяршылася мерапрыемства словамі вядучай дэбатаў, дацэнта кафедры рускай літаратуры і журналістыкі Людмілы Садко, якая пажадала маладым прамоўцам ніколі не спыняцца на дасягнутым і заўсёды дабівацца сваёй мэты.

Навумчык Анастасія,
спецыяліст кафедры рускай літаратуры і журналістыкі