You are here

Галоўная ››  Навіны ўніверсітэта ››  Культура беларуска-польскага памежжа без межаў

Культура беларуска-польскага памежжа без межаў

18-19 снежня 2014 г. група выкладчыкаў Брэсцкага дзяржаўнага ўніверсітэта імя А.С. Пушкіна прыняла ўдзел у навуковым семінары «Музыка беларуска-польскага памежжа» ў рамках Міжнароднага праекта «Kulturapogranicza pomostem integracji spolecznosci localnych w Euroregionie Bug». З беларускага боку кіраўніком праекта з’яўляецца праф. М.П. Жыгалава, з польскага - прафесар Люблінскага Каталіцкага Універсітэта Фелікс Чыжэўскі. Сувыканаўцам праекта і ўдзельнікамі семінара ад нашага ўніверсітэта сталі прафесар І.А. Швед, дацэнты М.С. Кавалевіч, Л.А. Захарчук, Л.В. Лаўрэенка.

Марыя Пятроўна Жыгалава прадставіла слухачам сучасную поліэтнічную песенную творчасць Маларытчыны ў суправаджэнні народнага ансамбля г. Маларыты “Рыцкі куфэрак”. Іна Анатольеўна Швед вызначыла ролю песеннага кода ў каравайным абрадзе Брэстчыны. Лідзія Аляксандраўна Захарчук пазнаёміла слухачоў з каляндарна-абрадавых фальклорам Брэстчыны ў эстэтычным аспекте. Ларыса Віктараўна Лаўрэенка прадставіла матэрыял, прысвечаны народнай песеннай творчасці на Палессі ў 20-30-я гады XX стагоддзя.

Пасля выступлення Марыі Сцяпанаўны Кавалевіч пра ролю беларускай народнай песні ў выхаванні нацыянальнай самасвядомасці моладзі каардынатар праекта з польскага боку прафесар Фелікс Чыжэўскі прапанаваў пашырыць даследчае поле праекта і ўключыць раздзел «Народная педагогіка і яе выкарыстанне ў беларускай песеннай творчасці».

У ходзе семінара гучалі песні на рускай, беларускай, польскай, украінскай мовах у выкананні народнага ансамбля «Рыцкі куфэрак» пад кіраўніцтвам Барысюка Анатоля Мікалаевіча. Студэнтка філалагічнага факультэта Анастасія Аксёнава выканала аўтэнтычныя песні в. Выганашчы Івацэвіцкага р-на: «Чужая старонка незнаёмая...», «Млын», «Восень мая глыбокая...».

Вялікую цікавасць да семінара і далейшага лёсу праекта праявілі мясцовыя польскія ўлады. Удзельнікаў семінара віталі кіраўнікі Gminny Ośrodek Kultury i Oświaty w Wisznicach. Семінар наглядна прадэманстраваў: культура беларуска-польскага памежжа не мае межаў.

 Брэст – Люблін – Вішніца

Падзяліцца: