Квест-гульня «Мой універсітэт»

«Глядзі – за шклом ўзнагароды і фота мінулых гадоў ўсіх тых, хто прайшоў перашкоды, дабіўшыся вялікіх перамог». Вы адгадалі, дзе ва ўніверсітэце знаходзіцца гэтае месца? Правільна, гэта музей Алімпійскай славы. Яго, а таксама мноства іншых знакавых месцаў БрДУ імя А.С. Пушкіна трэба было знайсці 9 верасня першакурснікам геаграфічнага факультэта. Яны сталі ўдзельнікамі займальнай квест-гульні «Мой універсітэт».

Студэнтам неабходна было справіцца з тэкставым або ілюстраваным заданнем, адправіцца ў названы пункт і зрабіць там сэлфі. Да кожнага задання прыкладалася пазнавальная інфармацыя аб геаграфічным факультэце і аб нашым універсітэце ў цэлым. Самай хуткай і кемлівай стала каманда спецыяльнасці «Турызм і гасціннасць».

Мэта мерапрыемства – пазнаёміць пачаткоўцаў з геаграфіяй універсітэта. Арганізатарам квеста сталі намеснік дэкана па выхаваўчай працы геаграфічнага факультэта Н.С. Луцык, а таксама старшыня савета студэнцкага самакіравання факультэта Мікіта Кульбакоў.

У бліжэйшых планах арганізатараў – пашырыць маршрут квеста і арганізаваць арыентаванне па горадзе для іншагародніх студэнтаў першага курса.