Квест «Універ на далоні»

11 верасня ў БрДУ імя А.С. Пушкіна прайшоў квест #УніверНаДалоні, і зараз прыйшоў час пра яго расказаць. Для пачатку трохі гісторыі. Усё пачалося з ідэі дапамагчы першакурснікам хутчэй адаптавацца да ўніверсітэцкага рытму жыцця. Знайсці, дзе знаходзіцца тая ці іншая аўдыторыя, пазнаёміцца са студэнтамі іншых факультэтаў – на ўсё гэта сыходзіць у лепшым выпадку месяц. А квест дапамагае аператыўна даведацца пра структуру ўніверсітэта.

Адкрылі мерапрыемства другі сакратар Брэсцкай гарадской арганізацыі грамадскага аб’яднання «БРСМ» Аляксандр Зорын і сакратар першаснай арганізацыі ўніверсітэта Максім Азарчук.

Арганізатары размясцілі станцыі квеста каля самых запатрабаваных кабінетаў па ўсіх карпусах – каля медпункта, чытальнай залы, бухгалтэрыі і інш. Каманды студэнтаў былі наўмысна сфарміраваныя так, каб у кожнай з іх было па адным студэнце ад кожнага факультэта, што спрыяла новым знаёмствам. Затым ўдзельнікам расказалі правілы і адправілі каманды шукаць пункты з заданнямі.

Усяго для кожнай каманды было падрыхтавана 10 розных заданняў: ад пытанняў на логіку да праверкі на вынослівасць. Пасля праходжання ўсіх пунктаў вызначыліся чатыры лідары з максімальнай колькасцю балаў, таму пераможцу выбралі з дапамогай дадатковага задання. Атрымала перамогу каманда «Ружа вятроў».

Удзельнікі падзяліліся ўражаннямі:

Ганна Левандоўская:

– У пачатку было страшнавата, таму што амаль ніхто нікога не ведаў. Перш за ўсё нам трэба было бегчы ў стары корпус. Мы думалі, што заданні будуць мегаскладанымі, але з першым мы справіліся за 14 хвілін. Шмат цікавых загадак. Даведалася, што і дзе знаходзіцца ва ўніверсітэце. Напэўна, больш за ўсё спадабалася пляскаць паўтары хвіліны і «Павуцінка». Рабяты ў камандзе былі крутыя, ёсць нават добрыя фатаграфіі. Мне вельмі спадабалася!

Вольга Рабацэвіч:

– Квест быў вельмі цікавым і запамінальным. Незвычайныя заданні ў спалучэнні з рознымі лакацыямі выклікалі цікавасць і жаданне іх выконваць, што ў выніку прывяло нашу каманду да поспеху. Дзякуй саюзу моладзі і ўдзельнікам квеста за добра праведзены час!

Анастасія Філімонава:

– Квест прайшоў выдатна, шмат пазітыўных уражанняў, пазнаёмілася з многімі людзьмі з іншых факультэтаў, гэта былі прыемныя знаёмствы. Дзякуй за выдатны настрой!

Максім Азарчук,
сакратар п/а ГА «БРСМ» з правамі РК УА «БрДУ імя А.С. Пушкіна»