Мемарыяльная дошка Ядвізе Чарняўскай усталявана на вуліцы Машэрава

11 лістапада ў г. Брэсце па адрасе пр-т Машэрава, 57 адбылася ўрачыстая цырымонія адкрыцця мемарыяльнай дошкі ў памяць пра заслужанага работніка культуры БССР, удзельніцу антыфашысцкага і партызанскага руху ў гады Вялікай Айчыннай вайны, педагога, кандыдата філалагічных навук Ядвігу Антонаўну Чарняўскую. Ініцыятарам адкрыцця мемарыяльнай дошкі выступіла кафедра тэорыі і гісторыі рускай літаратуры Брэсцкага дзяржаўнага ўніверсітэта імя А.С. Пушкіна. Зрабіў мемарыяльную дошку брэсцкі скульптар Аляксей Паўлючук.

З цёплымі словамі ў адрас Ядвігі Антонаўны на ўрачыстым адкрыцці выступілі рэктар БрДУ імя А.С. Пушкіна Г.М. Сендзер, намеснік старшыні выканаўчага камітэта г. Брэста Г.І. Барысюк і загадчык кафедры тэорыі і гісторыі рускай літаратуры Т.В. Сянькевіч. У мерапрыемстве ўзялі ўдзел улады горада, студэнты, выкладчыкі і тыя, хто ведаў і памятае Ядвігу Антонаўну.

У гэтым годзе ёй споўнілася б 100 гадоў.

Нарадзілася Ядвіга Антонаўна 15 сакавіка 1914 г. у сям'і рознарабочага ў вёсцы Аляксандраўка Журавіцкага раёна Гомельскай вобласці. Скончыла сямігадовую школу. З 1933 па 1937 г. вучылася ў Мінскім педагагічным інстытуце імя А.М. Горкага. У гады Вялікай Айчыннай вайны ўдзельнічала ў камсамольскім падполлі Брэста. У пачатку сакавіка 1944 года пайшла ў партызанскі атрад імя Макарэвіча – брыгаду імя Свярдлова Брэсцкага партызанскага злучэння, дзе арганізавала «лясную» школу для дзяцей партызан. Пасля вызвалення Брэста ад фашыстаў вярнулася ў горад і працягнула працу ў педвучылішчы. Ядвіга Антонаўна працавала на кафедры тэорыі і гісторыі рускай літаратуры Брэсцкага дзяржаўнага ўніверсітэта імя А.С. Пушкіна з 1956 па 1994 гады выкладчыкам, старшым выкладчыкам, загадчыкам кафедры (1963-1969 гг.), дацэнтам.

Навуковая, выкладчыцкая і грамадская, асветніцкая, выхаваўчая дзейнасць Я.А. Чарняўскай адзначана медалямі «За працоўную адзнаку», «За доблесную працу ў азнаменаванне 100-годдзя з дня нараджэння У.І. Леніна», нагрудным знакам «Выдатнік народнай асветы БССР», Граматай Вярхоўнага Савета БССР, прысвоена званне «Заслужаны работнік культуры БССР». За ўдзел у Вялікай Айчыннай вайне ўзнагароджана медалямі «За адвагу», «20 гадоў Перамогі ў Вялікай Айчыннай вайне», «50 гадоў Узброеных сіл СССР», «25 гадоў Перамогі ў вайне 1941 – 1945 г. ». У 2000 годзе ў гонар 55-годдзя Перамогі ўручаны знак «Ветэран вайны 1941 –1945 гадоў» за подпісам А.Р. Лукашэнкі.

Я.А. Чарняўская дала пуцёўку ў жыццё шматтысячнаму корпусу настаўнікаў-філолагаў, выкладчыкаў, выхавальнікаў, яе ведаюць і памятаюць шматлікія пакаленні студэнтаў, сённяшніх настаўнікаў, выкладчыкаў ВНУ. Многім сваім вучням Ядвіга Антонаўна стала добрым сябрам, галоўным дарадцам і настаўнікам на доўгія гады. Жыццё Я.А. Чарняўскай без перабольшання можна назваць і подзвігам, і праведніцтвам, бо ў любых абставінах яна заставалася Чалавекам, Настаўнікам, Асобай.

Кафедра тэорыі і гісторыі рускай літаратуры