Месца сустрэчы – псіхолага-педагагічны факультэт

14 лютага на псіхолага-педагагічным факультэце прайшла чарговая, ужо традыцыйная, акцыя «Студэнт на адзін дзень». У гэты раз гасцямі факультэта сталі вучні выпускных класаў СШ №13 г. Брэста. Пра спецыяльнасці «Пачатковая адукацыя», «Сацыяльная педагогіка», «Выяўленчае мастацтва і чарчэнне, народныя мастацкія промыслы», «Псіхалогія», асаблівасці навучання і перспектывы працаўладкавання пасля атрымання адукацыі на псіхолага-педагагічным факультэце расказалі зацікаўленым школьнікам дэкан Святлана Серафімаўна Кацэвіч і загадчык кафедры педагогікі пачатковага навучання Таццяна Віктараўна Нічышына.

Арыгінальным падарункам для гасцей у Дзень Святога Валянціна стаў канцэрт, падрыхтаваны таленавітымі студэнтамі факультэта. Песні пра каханне, музычныя мініяцюры і запальныя ўсходнія танцы вельмі спадабаліся вучням.

Госці наведалі Зімовы сад, Галерэю творчасці, пазнаёміліся з «пашпартамі спецыяльнасцей» факультэта і, нарэшце, сталі на час студэнтамі ў аўдыторыі на лекцыі кандыдата педагагічных навук, дацэнта кафедры пачатковага навучання – Мельнічук Ірыны Аляксандраўны.

Студэнты псіхолага-педагагічнага факультэта, як заўсёды, былі гасціннымі гаспадарамі: расказвалі пра студэнцкае жыццё, сесіі, практыкі і пад., частавалі ласункамі і правялі экскурсію па факультэце.

Госці таксама прыйшлі з сюрпрызам. Велізарнае пунсовае сэрца стала не толькі падарункам да Дня Валянціна, але і сімвалам самага гуманнага, «сардэчнага» факультэта!

У кнізе водгукаў ганаровых гасцей з'явіліся новыя захапляльныя запісы, найлепшыя пажаданні і запэўніванні стаць годнымі студэнтамі псіхолага-педагагічнага факультэта.

Псіхолага-педагагічны факультэт