«Напішы вестку ветэрану»

5 мая 2017 года ў фае вучэбнага корпуса № 1 БрДУ імя А.С. Пушкіна прайшла акцыя «Напішы вестку ветэрану», прымеркаваная да Дня Перамогі. Арганізатарам акцыі выступіў Брэсцкі філіял РУП «Белпошта». Актыўную дапамогу ў правядзенні мерапрыемства аказалі студэнты-валанцёры нашага ўніверсітэта.

Мэта акцыі «Напішы вестку ветэрану» – развіццё ў яе ўдзельнікаў пачуцця патрыятызму і гонару за гераічнае мінулае краіны, а таксама папулярызацыя ручнога пісьма ў моладзі.

Удзельнікі куплялі паштоўкі са святочнай сімволікай, на якіх запісвалі словы ўдзячнасці ветэранам за здзейснены подзвіг, мірнае неба над Беларуссю і шчаслівую будучыню.

Усяго падчас акцыі ветэранам былі адпраўлены больш за 150 вестак. Сярод аўтараў пасланняў – студэнты, выкладчыкі, супрацоўнікі ўніверсітэта. Сваю вестку ветэранам падрыхтавала і рэктар БрДУ Ганна Мікалаеўна Сендзер.

Мы ніколі не забудзем подзвіг ветэранаў
і назаўсёды захаваем яго ў нашых сэрцах!
З Днём Перамогі!

Г.С. Карабчук