Першы этап UNIVERSITY RINGO OPEN 2014/15

Студэнцкія канікулы імкліва праляцелі, і новы навучальны год ужо дыктуе свае абавязковыя алгарытмы. На факультэце фізічнага выхавання лекцыйныя і семінарскія заняткі перамяжоўваюцца не толькі з трэніроўкамі, але і са стартаваўшымі спаборніцтвамі. Так, студэнты, якія спецыялізуюцца ў футболе, ужо правялі першы пераможны матч ХХIV чэмпіянату горада Брэста па міні-футболе. А рынгісты ў сваю чаргу адзначыліся гульнямі Першага этапу Адкрытага чэмпіянату Установы адукацыі «Брэсцкі дзяржаўны ўніверсітэт імя А.С. Пушкіна», які праходзіць пад назвай UNIVERSITY RINGO OPEN 2014/15.

Турнір арганізаваны кафедрай спартыўных дысцыплін факультэта фізічнага выхавання (загадчык кафедры дацэнт К.І.Белы, галоўны суддзя спаборніцтваў – арбітр міжнароднай катэгорыі па рынга дацэнт У.П.Люкевіч). У спаборніцтвах прымаюць удзел студэнты нашага ўніверсітэта, якія прадстаўляюць факультэт фізічнага выхавання; для іх рынга з'яўляецца спецыялізацыяй.

Спаборніцтвы праходзяць у некалькі этапаў і фінішуюць да мая наступнага года. Кожны з удзельнікаў па выніках матчаў будзе набіраць рэйтынгавыя балы, па суме якіх і вызначыцца чэмпіён. Лепшыя рынгісты маюць шанцы для ўдзелу ў Адкрытым чэмпіянаце Беларусі. Дарэчы, вопыт падобнага ўдзелу нашы студэнты ўжо мелі. Два гады запар яны прадстаўлялі нашу ВНУ і рэгіён у нацыянальным чэмпіянаце, а Іван Шулькевіч, які ў двух папярэдніх сезонах быў наймацнейшым у катэгорыі мужчын, да гэтага часу ўваходзіць у спіс лепшых рынгістаў краіны.

Дарэчы, Іван Шулькевіч, які пасля заканчэння ўніверсітэта працуе цяпер у радах мытнай службы Рэспублікі Беларусь, па выніках спецыялізацыі атрымаў імянны сертыфікат ад Беларускай федэрацыі рынга з правам выкладання гэтай дысцыпліны. Такія ж сертыфікаты атрымалі нашы выпускніцы Юлія Панасюк і Аліна Шчарбук. Па выніках гэтага навучальнага года на падобныя сертыфікаты прэтэндуюць студэнты 4-га курса Віталь Іванюк і Міхаіл Кепцюха.

Што да матчаў Першага этапу UNIVERSITY RINGO OPEN 2014/15, то яны прайшлі ў выключна напружанай барацьбе. У фінальным матчы, што стаў сапраўднай сенсацыяй турніру, сустрэліся Аляксандр Гардзяюк і Ілля Кандратовіч. У выніку перамогу святкаваў Аляксандр Гардзяюк, які выйграў з лікам 11: 5.

Пяцёрка лідараў у Агульнай класіфікацыі пасля правядзення Першага этапу UNIVERSITY RINGO OPEN 2014/15 выглядае наступным чынам:

1. Аляксандр Гардзяюк – 10 балаў
2. Ілля Кандратовіч – 9 балаў
3. Ілля Ліштван – 8 балаў
4. Аляксандр Мінкевіч – 7 балаў
5. Павел Цімашук – 6 балаў.

Другі этап UNIVERSITY RINGO OPEN 2014/15 запланаваны на канец кастрычніка гэтага года.

Міхаіл Кепцюха,
студэнт 4-га курса факультэта фізічнага выхавання,
капітан зборнай універсітэта па рынга