«Простае рашэнне складаных праблем»

«Простае рашэнне складаных праблем» – пад такой назвай 26 кастрычніка 2015 года прайшоў семінар-практыкум (у рамках школы «Вопыт») для студэнтаў-куратараў усіх факультэтаў нашага ўніверсітэта. Арганізатарамі семінара выступілі педагогі-псіхолагі аддзела выхаваўчай працы з моладдзю Тарасюк Вікторыя Васільеўна і Ануфрыкава Наталля Сяргееўна.

Мэтай гэтага мерапрыемства стала садзейнічанне ў інфармацыйнай і кансультацыйнай падтрымцы студэнтаў-куратараў. У ходзе семінара навучэнцам было прапанавана прайсці тэст Айзенка, з дапамогай якога можна было выявіць свае асобасныя рысы, а таксама была дадзена магчымасць абмеркаваць з педагогамі-псіхолагамі цяжкасці ў працы з першакурснікамі, якім неабходна дапамога ў адаптацыі.

Спецыялісты сацыяльна-педагагічнай і псіхалагічнай службы расказалі пра ўзроўні адаптаванасці першакурснікаў, а студэнты-куратары падзяліліся сваімі ідэямі і прапановамі, што садзейнічаюць адаптацыі. Так, актывісты геаграфічнага факультэта прапанавалі праводзіць больш спартыўных мерапрыемстваў, дабрачынных акцый, караоке-конкурсаў. Прадстаўнікі факультэта замежных моў лічаць неабходнай арганізацыю сумесных псіхалагічных трэнінгаў, семінараў для старшакурснікаў і першакурснікаў. Студэнты фізіка-матэматычнага факультэта параілі ўключыць у штогадовы план Тыдня ведаў правядзенне квест-гульні для першакурснікаў, сумеснага чаявання, прагляду фільмаў, музычных вечароў у інтэрнатах. Філалагічны факультэт падаў ідэю сумесных паходаў у кіно, тэатр, на канцэрты. Студэнты-куратары сацыяльна-педагагічнага факультэта парэкамендавалі праводзіць для першакурснікаў трэнінгі на згуртаванне, экскурсіі, сустрэчы ў нефармальнай абстаноўцы.

Падводзячы вынікі, удзельнікі семінара абмяняліся меркаваннямі і атрымалі практычныя рэкамендацыі.

Аддзел выхаваўчай працы з моладдзю