Рэгіянальны вучэбна-метадычны семінар «Гімнастыка ў сучаснай школе: стан, праблемы, перспектывы развіцця» і майстар-класы

3 красавіка 2019 года на базе спартыўнага комплексу (залы гімнастыкі) УА «Брэсцкі дзяржаўны ўніверсітэт імя А.С. Пушкіна» адбыўся рэгіянальны вучэбна-метадычны семінар «Гімнастыка ў сучаснай школе: стан, праблемы, перспектывы развіцця» і майстар-класы па сучасных аздараўленчых тэхналогіях у практыцы фізічнага выхавання навучэнцаў розных кантынгентаў: школьнікаў, студэнцкай моладзі, дарослага насельніцтва.

У семінары і майстар-класах, арганізаваных кафедрай спартыўных дысцыплін і методык іх выкладання сумесна з кафедрай фізічнага выхавання і спорту УА «Брэсцкі дзяржаўны тэхнічны ўніверсітэт» і базавымі школамі г. Брэста, прыняў удзел прафесарска-выкладчыцкі склад дзвюх УВА г. Брэста і настаўнікі фізічнай культуры і здароўя школ Брэсцкага рэгіёна.

На семінары былі заслуханы даклады па вучэбна-метадычнай тэматыцы: танцавальна-гімнастычныя практыкаванні з прадметамі ў фарміраванні і зберажэнні здароўя навучэнцаў і студэнцкай моладзі; гімнастыка ў тыпавой вучэбнай праграме УВА; павышэнне эфектыўнасці ўрокаў «Фізічнай культуры і здароўя» сродкамі нетрадыцыйных відаў гімнастыкі; элементы кантролю на занятках па фізічнай культуры з выкарыстаннем інавацыйных тэхналогій; элементы дыхальнай гімнастыкі ў вадзе на занятках па фізічнай культуры; стаўленне студэнцкай моладзі да здаровага ладу жыцця і фізкультурна-аздараўленчай дзейнасці; фізкультурна-спартыўныя і аздараўленчыя мерапрыемствы ў шосты школьны дзень: з вопыту работы УАСА Маскоўскага раёна горада Брэста і інш.

Удзельнікам семінара быў прапанаваны раздатачны матэрыял для выкарыстання ў практыцы фізічнага выхавання. Усе прысутныя не толькі азнаёміліся з методыкамі правядзення заняткаў, але і змаглі практычна выканаць прапанаваныя комплексы фізічных практыкаванняў на майстар-класах.

На мерапрыемстве адбыўся зацікаўлены дыялог, абмен перадавым айчынным і замежным вопытам па выкарыстанні сродкаў фізічнай культуры для фарміравання і зберажэння здароўя розных полаўзроставых груп насельніцтва, што спрыяюць паляпшэнню якасці адукацыйнага працэсу па фізічным выхаванні.

Кафедра спартыўных дысцыплін і методык іх выкладання