Рэспубліканская студэнцкая алімпіяда па праграмаванні

2-4 лістапада 2016 года ў Беларускім дзяржаўным універсітэце (Мінск) адбыліся XIX камандныя спаборніцтвы па праграмаванні сярод студэнтаў Заходняга рэгіёна (1/4 фіналу сусветнага першынства). Гэтае мерапрыемства разглядаецца ВНУ Беларусі як Рэспубліканская студэнцкая алімпіяда па праграмаванні. У названых прэстыжных спаборніцтвах прынялі ўдзел і дзве каманды фізіка-матэматычнага факультэта нашага ўніверсітэта.

Праграма алімпіяды прадугледжвала праектаванне алгарытмаў і праграм на мовах высокага ўзроўню. Спаборніцтвы праводзіліся па схеме спаборніцтваў АСМ. Студэнтам было прапанавана 12 алгарытмічных задач, якія неабходна было рашыць за 5 гадзін. Згодна з рэгламентам кожнай камандзе даваўся толькі адзін камп’ютар. Перамога прысуджалася зборнай, якая рашыла найбольшую колькасць задач за найменшы час.

Трэці год запар адна з каманд фізіка-матэматычнага факультэта ў складзе студэнтаў 4 курса Собіна Уладзіслава Андрэевіча, Пацёмкіна Антона Ігаравіча і Пеўкіна Дзяніса Яўгенавіча (кіраўнік і трэнер каманды – старшы выкладчык кафедры прыкладной матэматыкі і інфарматыкі Кандрацюк Аляксандр Пятровіч) атрымала дыплом 3 ступені і выйшла ў паўфінал XIX каманднага чэмпіянату свету па праграмаванні сярод студэнтаў, які пройдзе ў Санкт-Пецярбургу ў снежні 2016 года.

Віншуем пераможцаў і жадаем поспехаў у паўфінале!

Дэканат фізіка-матэматычнага факультэта