Семінар для перспектыўнай студэнцкай моладзі Брэсцкай вобласці

10 кастрычніка 2014 года на базе ўніверсітэта прайшоў семінар для асоб, уключаных у перспектыўны кадравы рэзерв Брэсцкага абласнога выканаўчага камітэта з ліку студэнтаў.

У працы семінара прынялі ўдзел студэнты нашага ўніверсітэта, Брэсцкага дзяржаўнага тэхнічнага ўніверсітэта, а таксама студэнты Палескага і Баранавіцкага дзяржаўных універсітэтаў.

З прывітальным словам перад удзельнікамі семінара выступіла прарэктар па выхаваўчай і сацыяльнай працы Брэсцкага дзяржаўнага ўніверсітэта імя А.С.Пушкіна, кандыдат педагагічных навук, дацэнт Інга Генадзьеўна Матыцына.

Таксама для ўдзельнікаў семінара выступіў начальнік галоўнага ўпраўлення ідэалагічнай працы, культуры і па справах моладзі Аляксандр Андрэевіч Мурашкін. Яго аповяд аб асабістым прафесійным вопыце, а таксама аб этапах станаўлення яго як упраўленца і кіраўніка быў для студэнтаў карысны і актуальны, бо хутка яны самі стануць маладымі спецыялістамі, а некаторыя, магчыма, і кіраўнікамі.

Асабліва запамінальнай выйшла інтэрактыўная частка – інтэрактыўны семінар з элементамі трэнінгу «Я-канцэпцыя лідара», які для ўдзельнікаў семінара падрыхтавалі педагогі-псіхолагі аддзела выхаваўчай працы з моладдзю БрДУ імя А.С. Пушкіна Вікторыя Васільеўна Тарасюк і Ганна Паўлаўна Шывілька. Падчас трэнінгу студэнты навучыліся разумець адзін аднаго без слоў, ставіць мэты і дасягаць іх шляхам узаемадзеяння паміж сабой. Удзельнікі семінара не толькі зарадзіліся добрым настроем і набылі новыя знаёмствы, але таксама атрымалі для сябе інфармацыю, важную не толькі будучаму кіраўніку, але і любому студэнту.

Таксама для ўдзельнікаў гэтага семінара метадыст аддзела «Батанічныя экспазіцыі» Цэнтра экалогіі Наталля Рыгораўна Брацянкова правяла экскурсію ў Зімовы сад і Сад бесперапыннага цвіцення, дзе можна было палюбавацца экзатычнымі раслінамі.

Іна Ашмян,
студэнтка юрыдычнага факультэта