Семінар «Ідэалагічнае выхаванне ў фізічнай культуры і спорце»

Фізічная культура і спорт (ФК і С) з’яўляюцца адным з прыярытэтных напрамкаў дзяржаўнай сацыяльнай палітыкі Рэспублікі Беларусь. Узровень здароўя нацыі, фізічная культура асобы і грамадства, іх усебаковае гарманічнае развіццё, спартыўныя дасягненні разглядаюцца як паказчыкі трываласці палітычнай сістэмы. Ідэалогія дзяржавы закладзена ў Канстытуцыі Рэспублікі Беларусь, законах і падзаконных актах. У дзяржаўнай праграме развіцця ФК і С у Рэспубліцы Беларусь на 2016–2020 гг. у ліку чаканых ад рэалізацыі праграмы ўказана – павышаць якасць ідэалагічнай працы са спецыялістамі ўсіх узроўняў і катэгорый.

У сувязі з гэтым на факультэце фізічнага выхавання УА «Брэсцкі дзяржаўны ўніверсітэт імя А.С. Пушкіна» ўжо стала традыцыяй правядзенне сумесна з прадстаўніцтвам Нацыянальнага алімпійскага камітэта, а цяпер з Упраўленнем спорту і турызму Брэсцкага аблвыканкама семінара «Ідэалагічнае выхаванне ў фізічнай культуры і спорце». У семінары, які адбыўся 21 лютага 2018 года, удзельнічалі кіраўніцтва Упраўлення спорту і турызму Брэсцкага аблвыканкама, прафесарска-выкладчыцкі склад кафедры спартыўных дысцыплін і методык іх выкладання, студэнты 2-га курса факультэта фізічнага выхавання.

Асноўная мэта семінара – спрыяць сцвярджэнню грамадзянскасці студэнтаў, усвядомленых адносін іх да працэсаў у грамадстве і дзяржаве, звязаных са шматграннай і шматаспектнай сацыяльна-эканамічнай з’явай ФК і С, і выпрацоўцы актыўнай жыццёвай пазіцыі, што асабліва важна для будучых спецыялістаў вышэйшай кваліфікацыі, якія складуць аснову кіраўніцтва і вытворчасці фізкультурна-спартыўных паслуг рэгіёна.

На семінары абмяркоўваліся пытанні агульнатэарэтычнага і практычнага характару: асноўныя паняцці ідэалогіі, ідэалогія ФК і С, гісторыя, стан і праблемы ФК і С, алімпійскага руху, сучасныя асновы выхаваўчай і ідэалагічнай працы студэнтаў, якія займаюцца ФК і С, роля ветэранскага фізкультурна-спартыўнага руху ў выхаванні ідэалогіі і інш.

Мерапрыемства пачалося з экскурсіі па музеі гісторыі фізічнай культуры і спорту БрДУ імя А.С. Пушкіна, дзе адлюстравана развіццё, стан, дасягненні і вызначаны перспектывы ФК і С. Затым у вучэбнай аўдыторыі прадоўжыўся семінар.

Адкрыццё семінара і экскурсію па музеі правёў дэкан факультэта фізічнага выхавання С.А. Суркоў.

Аргкамітэт