Семінар «Праблемы адаптацыі замежных навучэнцаў да адукацыйнай прасторы ўніверсітэта»

Праблемы адаптацыі замежных навучэнцаў да адукацыйнай прасторы ўніверсітэта разглядалі 21 лютага 2017 года ўдзельнікі семінара, арганізаванага аддзелам выхаваўчай працы з моладдзю. У семінары прынялі ўдзел намеснікі дэканаў па выхаваўчай працы, куратары вучэбных груп, спецыялісты АВП, педагагічныя работнікі студгарадка, прадстаўнікі старастата замежных навучэнцаў, спецыялісты аддзела рэалізацыі праграм давузаўскай падрыхтоўкі і аддзела міжнародных сувязяў.

Актуальнасць разгляданай тэмы ў сваім вітальным слове акрэсліла кіраўнік аддзела выхаваўчай працы з моладдзю Таццяна Мікалаеўна Кошык. Яна нагадала ўдзельнікам семінара аб важнасці сумеснай працы па рэалізацыі мэтавай праграмы «Адаптацыя замежных навучэнцаў да адукацыйнай прасторы ўніверсітэта».

Педагог-псіхолаг сацыяльна-педагагічнай і псіхалагічнай службы Ганна Паўлаўна Шывілько агучыла вынікі маніторынгу адаптацыі замежных навучэнцаў да адукацыйнай прасторы ўніверсітэта. У сваім выступленні яна расказала пра матывы паступлення замежных студэнтаў у наш універсітэт, пра цяжкасці, з якімі яны сутыкаюцца ў працэсе адаптацыі да студэнцкага жыцця, пра асаблівасці правядзення імі вольнага часу і інш.

У ходзе семінара таксама абмяркоўваліся пытанні ўзаемадзеяння куратараў вучэбных груп, дзе навучаюцца замежныя студэнты, з рознымі структурнымі падраздзяленнямі ўніверсітэта і шляхі аптымізацыі гэтага ўзаемадзеяння.

У заключнай частцы семінара ўдзельнікі падкрэслілі важнасць полікультурнага выхавання ў сучаснай вышэйшай школе, прапанавалі цікавыя формы арганізацыі працы ў гэтым напрамку на ўзроўні вучэбнай групы і ў інтэрнаце.

Аддзел выхаваўчай працы з моладдзю