Справаздачны канцэрт вакальнай студыі эстрадных спеваў «Ступені»

Справаздачны канцэрт «Калі ў сэрцы жыве вясна» адбыўся ў БрДУ 10 красавіка. Ксенія Пухнарэвіч, Сафія Абрубка, Маргарыта Бітнева, Валерыя Ганусевіч, Кацярына Дымар, Ганна Крывецкая, Уладзіслаў Макарэвіч і Дзмітрый Машчук пад кіраўніцтвам дацэнта кафедры педагогікі сацыяльнай і пачатковай адукацыі Ларысы Борсук падрыхтавалі яркую праграму.

Сярод ганаровых гасцей на канцэрце прысутнічалі выкладчыкі Брэсцкага дзяржаўнага музычнага каледжа імя Р. Шырмы і кафедры педагогікі сацыяльнай і пачатковай адукацыі БрДУ, прадстаўнікі медыцынская сферы і, вядома, рэктар нашага ўніверсітэта Ганна Сендзер. Ганна Мікалаеўна паднялася на сцэну, павіншавала салістаў студыі са значнай падзеяй у іх творчым жыцці і падзякавала Ларысе Борсук за добрую працу.

Выкананне песень на рускай і англійскай мовах у некалькіх напрамках, асноўныя з якіх – эстрадны і R’n’B, зрабіла канцэртную праграму цікавейшай і больш разнастайнай. Вядомыя кампазіцыі «Шагай», «Любовь, похожая на сон», «Don’t speak», «Небеса» і іншыя з вуснаў салістаў «Ступеняў» гучалі шчыра і пранікнёна. Песні задавалі настрой гледачам, якія цёпла прымалі артыстаў. Асаблівымі авацыямі ўганараваліся выпускнікі студыі – госці канцэрта Ірына Замулка, Аляксандра Холапава і Фёдар Мартыновіч. Яркія вобразы, доўгія сукенкі і раскошныя прычоскі дзяўчат надавалі ім шарм, а касцюмы хлопцаў – бляск.

Завяршыўся канцэрт адной з самых лепшых песень з рэпертуару «Ступеняў» – «Лучшее ждёт нас впереди». Загадчык кафедры педагогікі сацыяльнай і пачатковай адукацыі Інга Матыцына ўручыла кветкі Ларысе Борсук і выказала падзяку ёй і ўдзельнікам канцэрта за цудоўны вечар.

Юлія Воўк, студэнцкі клуб