Студэнты юрыдычнага факультэта перамаглі ў Рэспубліканскім конкурсе бізнес-ідэй і праектаў

27 кастрычніка 2016 года на базе Беларускага дзяржаўнага эканамічнага ўніверсітэта (г. Мінск) адбыўся фінальны этап Рэспубліканскага конкурсу бізнес-ідэй і праектаў, які праводзіўся ў рамках стартап-форуму «Моладзь у прадпрымальніцтве». Наш універсітэт прадставіла каманда студэнтаў юрыдычнага факультэта (спецыяльнасць «Бізнес-адміністраванне»). Бізнес-праект, распрацаваны студэнцкай творчай групай, прайшоў жорсткі адборачны тур і быў адобраны журы для абароны ў фінале.

Студэнтаў зацікавіла праблема старой воданапорнай вежы, размешчанай каля спарткомплексу ўніверсітэта. Помнік інжынернай думкі XX стагоддзя, вежа на вуліцы Адама Міцкевіча састарэла і ўжо не можа выконваць закладзеныя ў яе функцыі. Каб увесці будынак у гаспадарчы абарот, студэнты прапанавалі арганізаваць ўнутры вежы музей навукі, эканамічна абгрунтаваўшы магчымасці інвесціравання ў праект з наступным выхадам на атрыманне прыбытку. Праект закліканы паказаць гісторыю вялікіх навуковых дасягненняў чалавецтва і пры гэтым мае сацыяльна арыентаваны характар, папулярызуючы навуковыя даследаванні сярод моладзі.

Кампетэнтнае журы конкурсу высока ацаніла праект «Інтэрактыўны музей навуковай думкі»: яму прысуджана званне «Лепшая бізнес-ідэя 2016 года» ў накірунку «Сацыяльныя праекты». Узнагарода была ўручана аўтарам праекта, студэнтам спецыяльнасці «Бізнес-адміністраванне» 2-га курса Анастасіі Грэчнай і Жанне Казінскай, і кіраўніку творчай групы, старшаму выкладчыку кафедры эканомікі і кіравання Арцёму Андрэевічу Чаркасаву.

Партнёрскую падтрымку Рэспубліканскаму конкурсу аказалі «Бізнес-школа ІПМ», ААТ «Белінвестбанк», Аналітычная прававая сістэма «Бізнес-Інфа» і іншыя арганізацыі. Для ўдзельнікаў конкурсу і дэлегацый-суправаджальнікаў сіламі партнёраў былі праведзены круглы стол, майстар-клас, стартап-майстэрні.

Віншуем пераможцаў конкурсу!
Жадаем паспяховай рэалізацыі праектаў!
Запрашаем патэнцыяльных інвестараў да супрацоўніцтва!

Юрыдычны факультэт