У БрДУ адбылася сустрэча ахоўнікаў правапарадку з замежнымі студэнтамі

7 снежня ў нашым універсітэце адбылася сустрэча кіраўніка аддзела па грамадзянстве і міграцыі адміністрацыі Маскоўскага раёна г. Брэста Дзмітрыя Тадэвушавіча Лыганоўскага і намесніка кіраўніка ўпраўлення па грамадзянстве і міграцыі Брэсцкага аблвыканкама Вадзіма Васільевіча Равенскага з замежнымі студэнтамі. Прадставіў гасцей прарэктар па навуковай працы Аляксандр Яўгенавіч Будзько.

Выступоўцы закранулі пытанні працаўладкавання, пражывання і незапланаванага выезду на радзіму замежных навучэнцаў. Вадзім Васільевіч нагадаў, што студэнты, якія прыехалі вучыцца ў нашу краіну, маюць права працаваць пры пэўных умовах. Добрая паспяховасць ва ўніверсітэце і афіцыйнае афармленне для сацыяльнай абароненасці – асноўныя моманты, якія трэба выконваць.

Пражываць усе студэнты-замежнікі павінны толькі ў інтэрнатах, аб арэндаваным жыллі гаворка не ідзе. Пры пэўных умовах (паспяховая вучоба і адсутнасць запазычанасці па аплаце за навучанне) студэнты апошняга курса і магістранты могуць прасіць дазволу на асобнае пражыванне.

Вадзім Васільевіч таксама акцэнтаваў увагу аўдыторыі на паводзінах замежных грамадзян на тэрыторыі Беларусі. Ён падкрэсліў, што замежнікі павінны паважаць нашы традыцыі і каштоўнасці, а таксама весці сябе культурна.

Дзмітрый Тадэвушавіч заклікаў не парушаць правапарадак. «Складанне пяці пратаколаў на замежнага грамадзяніна вядзе да дэпартацыі з краіны», – адзначыў ён. Кіраўнік аддзела па грамадзянстве і міграцыі таксама нагадаў студэнтам аб неабходнасці афармлення часовай рэгістрацыі на тэрыторыі нашай краіны.

Адно з пытанняў спікерам было звязана з выездам замежных студэнтаў у Еўропу. Госці растлумачылі, што замежныя навучэнцы маюць права выязджаць за мяжу, але толькі арганізаванай групай. Прыватныя паездкі выключаны. Аляксандр Яўгенавіч выказаў гатоўнасць універсітэта арганізоўваць туры для студэнтаў з іншых краін.

Юлія Воўк, рэдактар студэнцкага клуба