У БрДУ адбыўся ўрачысты прыём да Дня маці

14 кастрычніка 2018 года ў Беларусі адзначаецца самае пяшчотнае і кранальнае свята – Дзень маці. У нашым універсітэце, як і па ўсёй краіне, адбыліся мерапрыемствы, прымеркаваныя да гэтай даты. Традыцыйна самым важным для мам стаў прыём у рэктара Ганны Сендзер. На ўрачыстасць былі запрошаны шматдзетныя мамы, якія працуюць у БрДУ, мамы, якія выхоўваюць дзяцей з асаблівасцямі псіхафізічнага развіцця, маці-адзіночкі і жанчыны, якія аформілі апеку.

Ганна Мікалаеўна адзначыла, што праца мам – неацэнная, бо менавіта яны шчыра радуюцца поспехам дзяцей, суперажываюць, дапамагаюць добрым словам, парадай у цяжкія хвіліны, аберагаюць ад бед сваімі малітвамі. Ганна Мікалаеўна пажадала ўсім моцнага здароўя, дабрабыту, шчаслівых вачэй і невычэрпнай энергіі.

У падарунак ад рэктара ўніверсітэта мамы атрымалі матэрыяльнае заахвочванне. А агульная фатаграфія, зробленая падчас урачыстасці, доўгія гады будзе нагадваць жанчынам аб цёплай сустрэчы з Ганнай Мікалаеўнай.

Завяршыўся прыём канцэртнай праграмай, у рамках якой актывісты студэнцкага клуба выканалі трапяткія песні пра маму.

Юлія Воўк, рэдактар студэнцкага клуба