У руках студэнцтва – у БрДУ адбыўся Дзень самакіравання

Дзень самакіравання ў нашым універсітэце адзначылі 19 лістапада. Традыцыйна студэнты на адзін дзень сталі выкладчыкамі, прарэктарамі і нават рэктарам. Пасяджэнні ў рэктараце і дэканатах, прыём па асабістых пытаннях і правядзенне заняткаў – студэнты цалкам пагрузіліся ў кіраўнічую і выкладчыцкую дзейнасць.

Дублёр рэктара Сяргей Жук разглядаў пытанні ажыццяўлення падрыхтоўкі студэнтаў другой ступені вышэйшай адукацыі. Парадак дня дублёра першага прарэктара Станіслава Мароза – вынікі міжсесійнай атэстацыі і захаванне навучэнцамі вучэбнай дысцыпліны. Праблемамі, звязанымі са стварэннем СНТ універсітэта і ўнясення змяненняў у яго статут, займаўся дублёр прарэктара па навуковай працы Ілья Юзвук. Падрыхтоўка да правядзення фестывалю валанцёраў «Валанцёрства на карысць грамадства» і конкурсу «Павер у сябе» стаяла на парадку дублёра прарэктара па выхаваўчай працы Ксеніі Громік.

На вучэбных занятках кола тэм для вывучэння таксама было шырокае: раслінны і жывёльны свет, станаўленне дзяржаў, пісьменнасць і ўнутраны свет літаратурных герояў, ураўненні і задачы – студэнты-дублёры выкладчыкаў падрыхтавалі для аднакурснікаў пазнавальныя і цікавыя семінары і лабараторныя.

На студэнцкім рэктараце адзначылі, што студактывамі спланаваны і праведзены розныя мерапрыемствы, накіраваныя на актывізацыю вучэбнай дзейнасці і папярэджанне парушэнняў вучэбнай дысцыпліны. Ва ўніверсітэце створаны студэнцкія ініцыятыўныя групы, якія займаюцца распрацоўкамі стартап-праектаў. Абмеркаваны пытанні карпаратыўнай культуры.

Дублёры рэктара, прарэктараў і дэканаў прынялі праект рашэння па разгледжаных пытаннях. Ён змяшчае прапановы студэнтаў-дублёраў па павышэнню эфектыўнасці вучэбнага працэсу і ліквідацыі парушэнняў правілаў пражывання ў інтэрнатах. Напрыклад, прапануецца пашырыць сістэму інфармавання студэнтаў за кошт стварэння новых форм правядзення сустрэч з імі, а таксама часцей збірацца разам навучэнцам, лідарам студэнцкага самакіравання інтэрнатаў і выхавальнікам для абмеркавання актуальных пытанняў на лакальным узроўні.

Завяршыўся дзень самакіравання выніковым сходам студэнтаў-дублёраў з прарэктарам па выхаваўчай працы Таццянай Сакаловай і кіраўніком аддзела выхаваўчай працы з моладдзю Таццянай Кошык, на якім удзельнікі абмяняліся ўражаннямі.

Таццяна Васільеўна ад кіраўніцтва БрДУ павіншавала студэнтаў са святам, адзначыла паспяховую, плённую працу ўсіх дублёраў і пажадала ім здароўя, дасягнення мэтаў і ўдачы. Яна выказала ўпэўненасць у тым, што падобныя мерапрыемствы дапамагаюць навучэнцам глыбей акунуцца ў выбраныя спецыяльнасці.

Таксама ў гэты дзень адбылося шмат мерапрыемстваў на факультэтах. Фінальным акордам дня ўніверсітэта стала дыскатэка ў караоке-клубе «Цэльсій», арганізаваная прафкамам студэнтаў універсітэта.

Навучэнцы ўпэўнены, што святкаванне Дня студэнтаў такім чынам дапаможа ўдасканаліць падрыхтоўку кадраў.

Юлія Воўк, студэнцкі клуб