VI Рэгіянальная навукова-практычная канферэнцыя «Пачатковая школа: праблемы, прыярытэты і перспектывы развіцця»

10 лістапада 2016 года на псіхолага-педагагічным факультэце адбылася VI Рэгіянальная навукова-практычная канферэнцыя «Пачатковая школа: праблемы, прыярытэты і перспектывы развіцця», арганізатарам якой выступіла кафедра педагогікі сацыяльнай і пачатковай адукацыі.

З прывітальным словам да ўдзельнікаў канферэнцыі і прысутных студэнтаў факультэта звярнулася рэктар універсітэта, доктар педагагічных навук, прафесар Ганна Мікалаеўна Сендзер. Яе даклад «Культурная адукацыйная прастора ВНУ як аснова падрыхтоўкі кваліфікаванага педагога» быў прысвечаны праблемам полікультурнасці і канкурэнтаздольнасці адукацыі, павышэння прэстыжнасці педагагічнай прафесіі ў сучасных сацыякультурных умовах.

Працу пленарнага пасяджэння сваімі дакладамі працягнулі:

• Т.В. Нічышына, дэкан біялагічнага факультэта, кандыдат педагагічных навук, дацэнт – «Спецыфічныя асаблівасці прафілактыкі адхіляльных паводзін падлеткаў»;
• М.П. Осіпава, кіраўнік навукова-метадычнага цэнтра «Школа – Сям’я», кандыдат педагагічных навук, прафесар – «Тэарэтыка-метадычныя асновы стварэння мадэлі педагагічнага ўзаемадзеяння з сям’ёй на ўзроўні класнай супольнасці»;
• Т.В. Жук, дырэктар ДУА «Брэсцкі абласны цэнтр карэкцыйна-развівальнага навучання і рэабілітацыі» – «Фарміраванне талерантнага стаўлення да дзяцей з асаблівасцямі псіхафізічнага развіцця ва ўмовах цэнтра карэкцыйна-развівальнага навучання і рэабілітацыі»;
• Т.А. Кавальчук, заг. кафедры педагогікі, кандыдат педагагічных навук, дацэнт – «Пазнавальныя сродкі як аб’екты асваення малодшымі школьнікамі ў працэсе навучання».

У працы 5 секцый абмяркоўваліся актуальныя пытанні навучання і выхавання ў пачатковай школе, падрыхтоўка педагагічных кадраў, псіхалагічныя праблемы развіцця навучэнцаў малодшага школьнага ўзросту і арганізацыі педагагічнага ўзаемадзеяння з іх сем’ямі, метадычныя аспекты выкладання вучэбных дысцыплін у пачатковай школе.

У праграму канферэнцыі былі ўключаны даклады больш за 70 удзельнікаў, у тым ліку магістрантаў і студэнтаў БрДУ імя А.С. Пушкіна і іншых прадстаўнікоў устаноў адукацыі г. Брэста і Брэсцкай вобласці, а таксама навукоўцаў з універсітэтаў г. Беластока (Польшча) і г. Мінска.

Па выніках канферэнцыі плануецца выданне зборніка матэрыялаў.

Аргкамітэт канферэнцыі