VII Міжнародны навукова-практычны семінар “Сацыяльная псіхалогія здароўя і сучасныя інфармацыйныя тэхналогіі”

15 красавіка 2022 года на псіхолага-педагагічным факультэце БрДУ імя А.С. Пушкіна адбыўся VII Міжнародны навукова-практычны семінар “Сацыяльная псіхалогія здароўя і сучасныя інфармацыйныя тэхналогіі”.

Пасля прывітальнага слова дэкана факультэта Нічышынай Т.В. былі заслуханы пленарныя даклады, падрыхтаваныя Жук Т.В., дырэктарам Брэсцкага абласнога цэнтра карэкцыйна-развіццёвага навучання і рэабілітацыі, І.Я. Валітавай, кандыдатам псіхалагічных навук, дацэнтам, прафесарам кафедры сацыяльнай работы, А.Я. Марчанка, кандыдатам псіхалагічных навук, дацэнтам кафедры псіхалогіі, Мядзведскай А.І., кандыдатам псіхалагічных навук, дацэнтам, прафесарам кафедры сацыяльнай работы і інш. На пленарным пасяджэнні былі абмеркаваны актуальныя пытанні псіхалагічнай навукі: інклюзіўная культура будучага педагога, магчымасці развіццёвага ўзаемадзеяння ў дыядзе “маці – дзіця” ранняга ўзросту з парушэннямі развіцця, праблема самаацэнкі сучасных дзяцей і падлеткаў, асаблівасці адвольнай увагі дарослых актыўных інтэрнэт-карыстальнікаў і інш.

У другой палове дня для ўдзельнікаў семінара былі арганізаваны навучальныя майстар-класы “Сістэма свядомаснай трансфармацыі: самакаштоўнасць як умова прыняцця сябе”, “Па адзенні сустракаюць – па розуме праводзяць”, “Выкарыстанне прыёмаў цялесна-арыентаванай тэрапіі ў рабоце з псіхатраўмамі”, “Пункт раўнавагі: практыкум павышэння стрэсаўстойлівасці”, “Тэхніка саўладання са стрэсам”.

Па выніках правядзення семінара плануецца выданне зборніка матэрыялаў, у якім будуць адлюстраваны праблемы сацыяльнай псіхалогіі здароўя і ўздзеяння інфармацыйных тэхналогій на здароўе асобы.